កងទ័ពអាកាសអ៊ុយក្រែនបានឲ្យដឹងថា រុស្ស៊ីបានបាញ់មីស៊ីលផ្លោងអន្តរទ្វីបក្នុងការវាយប្រហារមួយនៅភាគខាងកើតអ៊ុយក្រែនកាលពីថ្ងៃព្រហស្បតិ៍។ អ៊ុយក្រែនបន្ថែមថា កងកម្លាំងរុស្ស៊ីបានបាញ់មីស៊ីលប្រភេទផ្សេងៗគ្នា សំដៅលើហេដ្ឋារចនាសម្ព័ន្ធសំខាន់ៗនៅក្នុងទីក្រុង Dnipro ភាគខាងកើតកាលពីព្រឹកថ្ងៃព្រហស្បតិ៍ ហើយការវាយលុកនោះរួមមាន ICBM ដែលបាញ់ចេញពីតំបន់ Astrakhan របស់រុស្ស៊ី ដែលមានចម្ងាយប្រហែល ៩០០ គីឡូម៉ែត្រពីទីក្រុង Dnipro ។
ប៉ុន្តែអ៊ុយក្រែនអះអាងថា ខ្លួនក៏បានបាញ់ទម្លាក់មីស៊ីលឆ្លងទ្វីបចំនួន ៦ គ្រាប់ផងដែរ តែមិនបាននិយាយពី ICBM នោះទេ។
ចំណែកអភិបាលក្នុងតំបន់បាននិយាយនៅលើប្រព័ន្ធផ្សព្វផ្សាយសង្គមថា ការវាយប្រហារបានបំផ្លាញផ្ទះសម្បែង និងរោងចក្រឧស្សាហកម្មមួយ បណ្តាលឱ្យមានអគ្គីភ័យ ខណមនុស្ស២នាក់ត្រូវបានគេរាយការណ៍ថាបានរងរបួស។
ទីភ្នាក់ងារសារព័ត៌មាន Reuters រាយការណ៍ថា នេះជាលើកទីមួយហើយ ដែលរុស្ស៊ីប្រើ ICBM ប្រឆាំងនឹងអ៊ុយក្រែន ចាប់តាំងពីការឈ្លានពានបានចាប់ផ្តើមនៅឆ្នាំ ២០២២ ខណដែល ICBMs អាចផ្ទុកក្បាលគ្រាប់នុយក្លេអ៊ែរ។ ប៉ុន្តែក៏មានរបាយការណ៍ផ្ទុយគ្នាអំពីប្រភេទកាំជ្រួចដែលរុស្ស៊ីបានប្រើប្រាស់ពិតប្រាកដ។ ប្រព័ន្ធផ្សព្វផ្សាយអាមេរិកមួយចំនួនបានរាយការណ៍ថា មីស៊ីលនេះគឺជាមីស៊ីលផ្លោង ប៉ុន្តែមិនមែនជា ICBM នោះទេ។ ការចុះផ្សាយបែបនោះ គឺបានយោងតាមការដកស្រង់សម្តីមន្ត្រីលោកខាងលិច។
ស្ថានទូតអាមេរិកក្នុងទីក្រុង Kyiv បានថ្លែងថា ខ្លួនបានទទួលព័ត៌មានជាក់លាក់នៃការវាយប្រហារតាមអាកាសដ៏មានសក្តានុពលមួយកាលពីថ្ងៃពុធ។ ទោះបីជាមិនមានការវាយប្រហារធំណាមួយត្រូវបានគេរាយការណ៍នៅថ្ងៃនោះក៏ដោយ ក៏មានការបារម្ភកាន់តែខ្លាំងឡើងថា រុស្ស៊ីអាចនឹងធ្វើការវាយលុកទ្រង់ទ្រាយធំប្រឆាំងនឹងអ៊ុយក្រែននៅពេលណាមួយនាពេលឆាប់ៗខាងមុខនេះ៕
ដោយ៖ ពេជ្រ
