ទីក្រុងហាងចូវ៖ ថ្ងៃទី១៨ ខែកញ្ញា ឆ្នាំ២០២៥ លោកជំទាវបណ្ឌិត គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា បានអញ្ជេីញផ្តល់សុន្ទរកថាស្វាគមន៍ ក្នុងសន្និសីទអន្តរជាតិស្តីពីសមាហរណកម្មរវាងឧស្សាហកម្ម និងការអប់រំក្នុងបរិបទការអប់រំ បណ្ដុះបណ្ដាលវិជ្ជាជីវៈអាស៊ាន ដោយមានការចូលរួមពីសំណាក់ ថ្នាក់ដឹកនាំក្រសួងអប់រំ យុវជន និងកីឡា និងលោក លោកស្រី តំណាងអង្គទូត សាកលវិទ្យាធិការ ភ្ញៀវកិត្តិយសអន្តរជាតិ ជាច្រើនរូប។
មានប្រសាសន៍ក្នុងឱកាសនោះ លោកជំទាវបណ្ឌិត រដ្ឋលេខាធិការប្រចាំការ បានថ្លែងអំណរគុណយ៉ាងជ្រាលជ្រៅដល់រដ្ឋាភិបាលចិនសម្រាប់មិត្តភាពដ៏រឹងមាំយូរអង្វែង និងការបន្តគាំទ្រដំណើរវិវត្តន៍ដ៏វែងឆ្ងាយនៃវិស័យអប់រំនៅកម្ពុជា។ ការផ្លាស់ប្តូរវិជ្ជាជីវៈ ការចែករំលែកធនធានឌីជីថល កិច្ចសហប្រតិបត្តិការរវាងកម្ពុជា និងចិន មិនត្រឹមតែពង្រឹងការអប់រំប៉ុណ្ណោះទេ ថែមទាំងក្លាយជានិមិត្តរូបនៃភាពជឿជាក់ និងអនាគតរួមគ្នារវាងប្រទេសចិន និងអាស៊ានផងដែរ។
ប្រទេសកម្ពុជាសព្វថ្ងៃស្ថិតនៅចំណុចរបត់មួយ ក្នុងកិច្ចខិតខំប្រឹងប្រែងឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ តាមរយៈការអនុវត្តយុទ្ធសាស្ត្របញ្ចកោណ ដំណាក់ទី១ ដែលផ្តោតលើការជំរុញកំណើនសេដ្ឋកិច្ច ដែលរួមបញ្ចូលការពង្រឹងជំនាញវិជ្ជាជីវៈ និងឌីជីថល។ ការអប់រំជាកម្លាំងបម្លែងយុវជនឱ្យទៅជាធនធានប្រកបដោយសក្តានុពល ជាអ្នកច្នៃប្រឌិត ជាអ្នកដឹកនាំ និងបម្លែងបញ្ហាប្រឈមទៅជាឱកាស ហើយអនាគតគឺជារបស់បុគ្គលដែលអាចមានសមត្ថភាពចេះសម្របខ្លួន បង្កើតឱកាស និងសហការ។ កត្តានេះហើយដែលជំរុញឱ្យកម្ពុជាហ៊ានធ្វើកំណែទម្រង់យ៉ាងសកម្មលើការអប់រំឌីជីថល តាមរយៈការលើកកម្ពស់ការសរសេរកូដ មនុស្សយន្ត (coding and robotics) ទៅក្នុងសាលារៀន ការសាងសង់ថ្នាក់រៀនឌីជីថល និងការបណ្តុះបណ្តាលគ្រូ ព្រមទាំងការពង្រីក និងពង្រឹងការអនុវត្តគន្លងវិជ្ជាជីវៈនៅតាមវិទ្យាល័យ និងគ្រឹះស្ថានឧត្តមសិក្សា។
បេសកកម្មរបស់ក្រសួងអប់រំ យុវជន និងកីឡា គឺធានាឱ្យបាននូវការផ្តល់ឱកាសឱ្យយុវជនកម្ពុជាគ្រប់រូបទទួលបានជំនាញ និងទំនុកចិត្តលើខ្លួនឯង ដើម្បីរីកចម្រើននៅក្នុងពិភពលោកដែលកំពុងវិវត្តយ៉ាងឆាប់រហ័ស ស្របទៅនឹងខ្លឹមសារនៃសន្និសីទ នាឱកាសនេះ។ ការបង្កើតសហគមន៍សមាហរណកម្មវិស័យអប់រំ-ឧស្សាហកម្មឌីជីថលចិន-អាស៊ាន មិនត្រឹមតែជាវេទិកាមួយប៉ុណ្ណោះទេ វាគឺជាស្ពាននៃក្តីសង្ឃឹម ផ្សារភ្ជាប់ប្រទេសជាតិ រួមបញ្ជូលប្រាជ្ញា និងបណ្តុះបណ្តាលទេពកោសល្យសម្រាប់អនាគត។
ជាមួយគ្នានេះ កម្ពុជាបានមើលឃើញគន្លងជាក់ស្តែងសម្រាប់កិច្ចសហប្រតិបត្តិការទៅលេី៖
-ការចែករំលែកចំណេះដឹង និងធនធានឌីជីថលសម្រាប់ការអប់រំវិជ្ជាជីវៈចិន-អាស៊ាន ដែលធានានូវលទ្ធភាពទទួលបានការអប់រំដ៏ទំនើប
-ការផ្លាស់ប្តូរ និងការបណ្តុះបណ្តាលគ្រូបង្រៀន ដើម្បីជំរុញឧត្តមភាព និងលើកកម្ពស់ស្តង់ដាវិជ្ជាជីវៈ និងផ្តល់សិទ្ធិអំណាចដល់គ្រូបង្រៀន និងយុវជនដែលមានជំនាញ ចូលរួមក្នុងការប្រកួតប្រជែងឌីជីថលអន្តរជាតិ
-ភាពជាដៃគូជាមួយឧស្សាហកម្មឱ្យកាន់តែស៊ីជម្រៅ ការបង្កើតសួនបណ្តុះបណ្តាល និងគម្រោងរួមគ្នារវាងសាលារៀន និងសហគ្រាស នៅក្នុងផ្នែកដូចជា អេឡិចត្រូនិក មេកាត្រូនិក បដិសណ្ឋារកិច្ច និងកសិកម្មឧស្សាហកម្ម ដែលផ្សារភ្ជាប់ជាមួយនឹងតម្រូវការទីផ្សារ
-ភាពជាដៃគូរវាងប្រទេសចិន និងសហគមន៍អាស៊ាន ក្នុងការធ្វើសមាហរណកម្មរវាងឧស្សាហកម្ម និងការអប់រំ ក្នុងបរិបទការអប់រំវិជ្ជាជីវៈ៕
