អ្នកនាំពាក្យយោធានៃចលនា លោក Yahya Saree បាននិយាយថា ក្រុមហ៊ូធី មកពីចលនាឧទ្ទាម Ansar Allah បន្តវាយប្រហារគោលដៅជាច្រើនក្នុងប្រទេសអ៊ីស្រាអែល ដោយប្រើប្រាស់យន្តហោះគ្មានមនុស្សបើក។
ក្រុមនេះ បានចាប់ផ្ដើមប្រតិបត្តិការយោធាទ្រង់ទ្រាយធំដោយប្រើយន្តហោះគ្មានមនុស្សបើកជាច្រើនគ្រឿង និងវាយប្រហារគោលដៅផ្សេងៗនៅទីក្រុង Negev, Eilat, Ashkelon, Ashdod និង Tel Aviv ។
យោងតាមអ្នកនាំពាក្យដដែល បានបន្ថែមថា យន្តហោះគ្មានមនុស្សបើក ៣ គ្រឿង វាយប្រហារគោលដៅ ២ នៅទីក្រុង Negev ហើយ ២ គ្រឿង វាយប្រហារអាកាសយានដ្ឋាន Ben Gurion និងទីតាំងសំខាន់នៅ Ashkelon ។
យន្តហោះគ្មានមនុស្សបើក ២ គ្រឿង បានវាយប្រហារគោលដៅសំខាន់នៅ Ashdod ។ ក្រៅពីនោះ តាមសម្ដីអ្នកនាំពាក្យ គឺអាកាសយានដ្ឋាន Ramon នៅខាងជើងក្រុង Eilat ក៏ត្រូវបានវាយប្រហារផងដែរ។
ដោយឡែក កងកម្លាំងការពារអ៊ីស្រាអែល (IDF) ក៏បានបញ្ជាក់ កាលពីថ្ងៃអាទិត្យថា យន្តហោះគ្មានមនុស្សបើកចេញពីប្រទេសយេម៉ែន បានធ្លាក់នៅជិតអាកាសយានដ្ឋាន Ramon ។ យោងតាមសេវារថយន្តសង្គ្រោះរបស់អ៊ីស្រាអែល អះអាងថាមនុស្សម្នាក់រងរបួសស្រាល និងជាច្រើននាក់ទៀតភៀសខ្លួនពីទីតាំងរងគ្រោះ៕
ដោយ៖ ពេជ្រ
