ឯកឧត្តម ស សុខា ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃបានបង្ហោះសារលើបណ្តាញសង្គមដែលមានខ្លឹមសារទាំងស្រុងថា៖ គិតត្រឹមថ្ងៃនេះ សម្ដេចមហាបវរធិបតី ហ៊ុន ម៉ាណែត ចូលកាច់ចង្កូតមាគ៌ាកម្ពុជា ក្នុងឋានៈជានាយករដ្ឋមន្ត្រី នៃរាជរដ្ឋាភិបាល នីតិកាលទី៧ នៃរដ្ឋសភា បានរយៈពេល ២ឆ្នាំ ៧ថ្ងៃហើយ។ ដំណើរជាតិ ក្រោមការដឹកនាំរបស់អ្នកបន្តវេន នៅវែងឆ្ងាយទៀត ហើយសម្ដេចធិបតីនៃយើង ត្រូវបន្តឈរមុខគេ ដោះស្រាយគ្រប់បញ្ហា ដើម្បីនាំមកជូនជាតិ និងប្រជាជននូវភាពកក់ក្ដៅក្នុងជីវភាពប្រចាំថ្ងៃ និងការបន្តឈរស្មើមុខប្រកបដោយកិត្តិយសលើឆាកអន្តរជាតិ។
យើងមានក្ដីស្រមៃ ហើយយើងបានគូសវាស និងអនុវត្តយ៉ាងសកម្ម ដើម្បីខិតខំសម្រេចឱ្យបានភាពជាប្រទេស មានប្រាក់ចំណូលខ្ពស់កម្រិតមធ្យមនៅឆ្នាំ២០៣០ និងប្រាក់ចំណូលខ្ពស់នៅឆ្នាំ២០៥០។ សន្តិភាព ជាបុរេលក្ខខណ្ឌដ៏ចាំបាច់បំផុតសម្រាប់ដំណើរទៅមុខឥតឈប់ឈរនៃជាតិយើង។ ប៉ុន្តែជាងមួយខែមកនេះ ថៃដែលជាប្រទេសក្បែរខាង បានព្យាយាមបំផ្លាញ ដើម្បីសម្រេចមហិច្ឆតាឈ្លានពានទឹកដី ផ្ទុយពីកិច្ចព្រមព្រៀងទ្វេភាគី និងច្បាប់អន្តរជាតិ។
ការថែរក្សាសន្តិភាព និងការពារបូរណភាពទឹកដី អធិបតេយ្យភាពជាតិ បានក្លាយជាបន្ទុកទទួលខុសត្រូវអាទិភាពបំផុតរបស់សម្ដេចធិបតី និងក៏ជាបន្ទុកដ៏ធំធេងបំផុតរបស់គណបក្សប្រជាជនកម្ពុជា ក្រោមការដឹកនាំរបស់សម្ដេចតេជោ ហ៊ុន សែន ដែលជាប្រធានគណបក្ស ទទួលបានសំឡេងបោះឆ្នោតគាំទ្រច្រើនលើសលប់ពីប្រជាពលរដ្ឋច្រើនជាងបក្សណាទាំងអស់ក្នុងប្រវត្តិសាស្រ្តជាតិ។ ក្នុងកាលៈទេសៈនេះ នយោបាយដឹកនាំ និងសកម្មភាពរបស់សម្ដេចធិបតី របស់ថ្នាក់ដឹកនាំរាជរដ្ឋាភិបាល និងដោយឡែកថ្នាក់ដឹកនាំគណបក្សប្រជាជនកម្ពុជា ដែលមានសម្ដេចតេជោ ជាប្រមុខ បានធ្វើឱ្យប្រជាជនទាំងក្នុង និងក្រៅប្រទេស មានភាពកក់ក្ដៅ និងប្រកបដោយទំនុកចិត្តខ្ពស់បំផុត។
ពលរដ្ឋមានភាពកក់ក្ដៅ និងទំនុកចិត្ត! ក៏ព្រោះតែទាំងសម្ដេចធិបតី ហ៊ុន ម៉ាណែត និងថ្នាក់ដឹកនាំគណបក្សប្រជាជនកម្ពុជា បានឆ្លើយតបប្រកបដោយភាពអង់អាច និងមុតស្រួចចំពោះទង្វើឈ្លានពានរបស់ថៃ ទាំងតាមមធ្យោបាយយោធា និងការទូត ជាពិសេសការបង្រួបបង្រួមស្មារតីប្រជាជន ដើម្បីស្វែងរកដំណោះស្រាយប្រកបដោយសន្តិភាព ឈរលើសកម្មភាពប្រកបដោយភាពថ្លៃថ្នូរ និងកិត្តិយសលើឆាកអន្តរជាតិ។ ជាសច្ចធម៌ ការដឹកនាំរបស់រាជរដ្ឋាភិបាល និងឥរិយាបថដ៏ល្អរបស់ប្រជាជនកម្ពុជា ក្នុងកាលៈទេសៈនេះ បានធ្វើឱ្យមជ្ឈដ្ឋានអន្តរជាតិ ទទួលស្គាល់ពីភាពចាស់ទុំនៃរាជរដ្ឋាភិបាលបន្តវេន និងឥរិយាបថប្រកបដោយសន្តិភាពរបស់ប្រជាជនកម្ពុជា។
ងាកមកមើលសមិទ្ធផលដែលរាជរដ្ឋាភិបាល សម្រេចបាន ក្នុងរយៈពេល២ឆ្នាំ ៧ថ្ងៃមកនេះ គឺកម្ពុជា បានបន្តថែរក្សាយ៉ាងរឹងមាំនូវសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម ធានាបាននូវប្រក្រតីភាព និងវឌ្ឍនភាពក្នុងការងារផ្ដល់សេវាសាធារណៈគ្រប់វិស័យ គ្រប់កម្រិតជូនប្រជាពលរដ្ឋ ធានាបានយ៉ាងរឹងមាំនូវស្ថិរភាពសេដ្ឋកិច្ច ភាពសម្បូរបែបនៃការផ្លាស់ប្ដូរពាណិជ្ជកម្មទ្វេភាគី និងពហុភាគី ព្រមទាំងការទទួលចុះបញ្ជីគម្រោងវិនិយោគពីបណ្ដាក្រុមហ៊ុនជាតិ និងអន្តរជាតិ ខណៈគម្រោងអភិវឌ្ឍន៍ហេដ្ឋារចនាសម្ព័ន្ធសាធារណៈ មានជាអាទិ៍ សាលារៀន ផ្លូវថ្នល់ ប្រព័ន្ធធារាសាស្ត្រ បណ្ដាញទឹកស្អាត អគ្គិសនី ។ល។ ជាពិសេសគម្រោងខ្នាតយក្ស ព្រែកជីកហ្វូណនតេជោ និងផ្លូវល្បឿនលឿនភ្នំពេញ-បាវិត ក៏បាននិងកំពុងអនុវត្តយ៉ាងសកម្ម។
នៅមានសមិទ្ធផលជាច្រើនទៀត ដែលយើងពុំអាចរៀបរាប់អស់ ក៏ប៉ុន្តែប្រជាជនកម្ពុជា បាននិងកំពុងមើលឃើញយ៉ាងជាក់ស្ដែង នាពេលបច្ចុប្បន្នរួចជាស្រេចទៅហើយ។ ជារួម អ្វីដែលកម្ពុជា កំពុងមាន និងអ្វីដែលកម្ពុជា ជឿជាក់ខ្ពស់ថានឹងសម្រេចបានតាមផែនការជាតិ គឺជាអ្វីដែលថ្នាក់ដឹកនាំជំនាន់មុន បានដាំដុះ និងពូនជ្រុំ និងជាអ្វីដែលរាជរដ្ឋាភិបាលបន្តវេន ដឹកនាំដោយសម្ដេចធិបតី បន្តទទួលថែទាំ និងដាំដុះថ្មីបន្ថែម គឺពូជសន្តិភាព និងពូជអភិវឌ្ឍន៍ ជាដរាប ដោយគ្មានទីបញ្ចប់៕
