ប្រធានាធិបតីអាមេរិក លោក Donald Trump បានអះអាងថា ជំនួបទ្វេភាគីរវាងប្រធានាធិបតីរុស្ស៊ី លោក Vladimir Putin និងលោក Vladimir Zelensky កំពុងត្រូវបានរៀបចំហើយ ហើយនឹងកើតទ្បើងឆាប់ៗនេះ។ លោក បានអះអាងបែបនេះ នៅក្នុងបទសម្ភាសន៍ជាមួយអ្នកកាសែតអាមេរិក Mark Levin កាលពីថ្មីៗនេះ។ លោកសង្កត់ធ្ងន់ថា“ ខ្ញុំបានជួបប្រកបដោយភាពជោគជ័យជាមួយប្រធានាធិបតីពូទីនហើយក៏បានជួបជាមួយប្រធានាធិបតី Zelensky ផងដែរ។
លោកបានបន្ថែមថា “ ពួកគេកំពុងស្ថិតក្នុងដំណើរការកំណត់ពេលនៃកិច្ចប្រជុំដែលអាចធ្វើទៅបាន ហើយយើងនឹងមើលថាមានអ្វីកើតឡើងនាពេលនោះ”។
លោក Trump ក៏បានសម្តែងសុទិដ្ឋិនិយមអំពីការដោះស្រាយជម្លោះនៅអ៊ុយក្រែនផងដែរ។ លោកមានប្រសាសន៍ថា “ អ្នកត្រូវមានសុទិដ្ឋិនិយមលើបញ្ហានេះ”។ ទន្ទឹមនឹងនោះ មេដឹកនាំអាមេរិកបានកត់សម្គាល់ថា ការដោះស្រាយវិបត្តិអ៊ុយក្រែន ប្រែទៅជាពិបាកជាងការរំពឹងទុក។
គួររំលឹកថា នៅថ្ងៃទី ១៨ ខែសីហា លោក Trump បានជួបប្រជុំជាមួយលោក Vladimir Zelensky របស់អ៊ុយក្រែននិងមេដឹកនាំសហភាពអឺរ៉ុប។ បន្ទាប់ពីកិច្ចពិភាក្សាទាំងនោះ លោក Trump បានទូរស័ព្ទទៅសមភាគីរុស្ស៊ីរបស់លោក គឺលោក Vladimir Putin។ នៅក្នុងការហៅទូរស័ព្ទរយៈពេល ៤០ នាទី មេដឹកនាំអាមេរិកបានពិភាក្សាអំពីការរៀបចំមួយទល់នឹងមួយរវាងលោក Putin និង Zelensky ដើម្បីបន្តនូវកិច្ចប្រជុំត្រីភាគីជាមួយលោក Trump ម្តងទៀត។
ជំនួយការរបស់វិមានក្រឹមឡាំង លោក Yury Ushakov បាននិយាយថា មេដឹកនាំរុស្ស៊ី និងសហរដ្ឋអាមេរិកបានគាំទ្រគំនិតនៃការរៀបចំកិច្ចប្រជុំដោយផ្ទាល់បន្ថែមរវាងទីក្រុងម៉ូស្គូ និងទីក្រុងគៀវ ខណៈដែលពួកគេក៏បានពិចារណាផងដែរ ក្នុងការលើកកម្ពស់ពួកគេឱ្យកាន់តែខ្ពស់ថែមទៀត៕
ដោយ៖ ពេជ្រ
