តុលាការធម្មនុញ្ញ បានសម្រេចព្យួរតំណែងលោកស្រី Paetongtarn Shinawatra ខណឧបនាយករដ្ឋមន្ត្រី លោក Suriya Juangroongruangkit នឹងក្លាយជានាយករដ្ឋមន្ត្រីបណ្ដោះអាសន្ន។
ប្រភពពីសារព័ត៌មាន The Nation Thailand រាយការណ៍ថា ការិយាល័យលេខាធិការដ្ឋានខុទ្ទកាល័យ បានរៀបចំផែនការបន្ទាន់មួយ ក្នុងករណីដែលតុលាការធម្មនុញ្ញ ទទួលយកញត្តិដាក់ដោយព្រឹទ្ធសភា និងបញ្ជាឲ្យព្យួរតំណែង នាយករដ្ឋមន្ត្រីលោកស្រី Paetongtarn Shinawatra ។
ក្រុមសមាជិកព្រឹទ្ធសភា បានស្នើសុំឱ្យតុលាការដកលោកស្រី Paetongtarn ចេញពីតំណែងជានាយករដ្ឋមន្ត្រី ក្រោមការចោទប្រកាន់ពីបទបះបោរដែលប៉ះពាល់ដល់អធិបតេយ្យភាពរបស់ប្រទេស ខណដែលលោកស្រី និយាយវាយប្រហារមេបញ្ជាការតំបន់កងទ័ពភូមិភាគពីរ ក្នុងសារសំឡេងសន្ទនាតាមទូរស័ព្ទជាមួយប្រធានព្រឹទ្ធសភាកម្ពុជា សម្ដេចតេជោ ហ៊ុន សែន។
ប្រភពដដែល បានឱ្យដឹងថា ឧបនាយករដ្ឋមន្ត្រី និងជារដ្ឋមន្ត្រីក្រសួងដឹកជញ្ជូន លោក Suriya Jungrungreangkit នឹងត្រូវតែងតាំងឱ្យកាន់តួនាទីជានាយករដ្ឋមន្ត្រីស្តីទីជំនួសលោកស្រី Paetongtarn ។ លោកនឹងមានសិទ្ធិអំណាចពេញលេញ ហើយនឹងត្រូវយកបញ្ហានេះទៅប្រជុំគណៈរដ្ឋមន្ត្រី ដើម្បីតែងតាំងឧបនាយករដ្ឋមន្ត្រីថ្មី ៕
ដោយ៖ ពេជ្រ
