ប្រធានាធិបតី Donald Trump បានថ្លែងឲ្យដឹងកាលពីថ្ងៃព្រហស្បតិ៍ថា លោកបានជ្រើសរើសទីប្រឹក្សាសន្តិសុខជាតិលោក Mike Waltz ធ្វើជាឯកអគ្គរដ្ឋទូតអាមេរិកប្រចាំអង្គការសហប្រជាជាតិ។
លោក Trump បានសរសេរនៅលើ Truth Social ថា “ខ្ញុំរីករាយក្នុងការប្រកាសថា ខ្ញុំនឹងតែងតាំងលោក Mike Waltz ឱ្យធ្វើជាឯកអគ្គរដ្ឋទូតសហរដ្ឋអាមេរិកបន្ទាប់ប្រចាំអង្គការសហប្រជាជាតិ”។
លោក Trump បាននិយាយបន្តថា “តាំងពីពេលគាត់ស្ថិតក្នុងឯកសណ្ឋាននៅសមរភូមិ ក្នុងសភា និងក្នុងនាមជាទីប្រឹក្សាសន្តិសុខជាតិ លោក Mike Waltz បានប្រឹងប្រែងធ្វើការដើម្បីដាក់ផលប្រយោជន៍ជាតិរបស់យើងជាមុនសិន។ ខ្ញុំដឹងថាគាត់នឹងធ្វើដូចគ្នាក្នុងតួនាទីថ្មីរបស់គាត់”។ លោកបានបន្ថែមថា រដ្ឋលេខាធិការលោក Marco Rubio នឹងធ្វើជាទីប្រឹក្សាសន្តិសុខជាតិបណ្តោះអាសន្ន។ តួនាទីនេះមិនតម្រូវឱ្យមានការបញ្ជាក់ពីព្រឹទ្ធសភាទេ។
សូមជម្រាបថា លោក Rubio ឥឡូវនេះកំពុងបម្រើក្នុងពេលដំណាលគ្នាក្នុងតួនាទីរដ្ឋាភិបាលចំនួនបួន។ កាលពីខែកុម្ភៈ លោក Trump បានតែងតាំងគាត់ជាអ្នកគ្រប់គ្រងស្តីទីនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍន៍អន្តរជាតិ (USAID) និងជា Archivist ស្តីទីនៅរដ្ឋបាលបណ្ណសារ និងកំណត់ត្រាជាតិ (NARA)។
តំណែងបេសកជនរបស់អង្គការសហប្រជាជាតិត្រូវបានបើកបន្ទាប់ពីលោក Trump បានដកការតែងតាំងលោកស្រី Elise Stefanik កាលពីខែមុនដោយនិយាយថា លោកស្រីនឹងស្នាក់នៅក្នុងសភាហើយ ចូលរួមជាមួយក្រុមអ្នកដឹកនាំសភាឡើងវិញ។
លោក Waltz អាយុ ៥១ ឆ្នាំអតីតសមាជិកសភាមកពីរដ្ឋ Florida បាននិយាយថា “គាត់មានកិត្តិយសយ៉ាងខ្លាំងក្នុងការបន្តការបម្រើរបស់ខ្ញុំចំពោះប្រធានាធិបតី Trump និងប្រជាជាតិដ៏អស្ចារ្យរបស់យើង”។
របាយការណ៍ប្រព័ន្ធផ្សព្វផ្សាយបាននិយាយមុននេះថាលោក Waltz និងអនុប្រធានរបស់គាត់គឺ Alex Wong ត្រូវបានកំណត់ឱ្យចាកចេញពីមុខតំណែងរបស់ពួកគេនៅឯសេតវិមាន។
គួររំលឹកថា លោក Waltz បានស្ថិតក្រោមការត្រួតពិនិត្យនៅក្នុងខែមីនា បន្ទាប់ពីគាត់បានច្រឡំបញ្ចូល Jeffrey Goldberg និពន្ធនាយកនៃទស្សនាវដ្តី The Atlantic នៅក្នុងការជជែកជាក្រុមកម្មវិធី Signal ដែលពិភាក្សាអំពីការវាយប្រហារយោធាអាមេរិកប្រឆាំងនឹងគោលដៅរបស់ក្រុម Houthi ក្នុងប្រទេសយេម៉ែន៕
ដោយ៖ ពេជ្រ
