ប្រទេសអ៊ីរ៉ង់បានធ្វើព្យុហយាត្រាយោធានៅក្នុងរដ្ឋធានី Tehran កាលពីថ្ងៃសុក្រម្សិលមិញ ដើម្បីរំលឹកដល់កងកម្លាំងប្រដាប់អាវុធរបស់ខ្លួន។
ប្រធានាធិបតីអ៊ីរ៉ង់ជាធម្មតារិះគន់សហរដ្ឋអាមេរិក និងអ៊ីស្រាអែលនៅក្នុងសុន្ទរកថារបស់ពួកគេ ប៉ុន្តែនៅក្នុងសុន្ទរកថាក្នុងថ្ងៃព្យុះហយាត្រានោះ មិនមានឃ្លាណាមួយដែលអ៊ីរ៉ង់រិះគន់អាមេរិកនោះទេ។
ប្រធានាធិបតី Masoud Pezeshkian បាននិយាយថា កងកម្លាំងអ៊ីរ៉ង់មានភាពក្លាហាន និងមិនអនុញ្ញាតឱ្យសត្រូវចូលប្រទេសបានដោយងាយៗនោះទ្បើយ។ លោកបានបន្ថែមថា លោកមានមោទនភាពខ្លាំងណាស់ដែលពេលនេះយោធារបស់ប្រទេសលោកបានរីកចម្រើនក្នុងការផលិតឧបករណ៍ចាំបាច់ទាំងអស់ដោយខ្លួនឯង។
សូមជម្រាបថា ក្បួនដង្ហែមានបំពាក់កាំជ្រួច យន្តហោះគ្មានមនុស្សបើក និងរថក្រោះ។
មន្ត្រីជាន់ខ្ពស់របស់អ៊ីរ៉ង់ និងសហរដ្ឋអាមេរិកបានពិភាក្សាគ្នាអំពីកម្មវិធីនុយក្លេអ៊ែររបស់ទីក្រុងតេអេរ៉ង់កាលពីសប្តាហ៍មុន។ ភាគីទាំងពីរបានពណ៌នាកិច្ចប្រជុំនេះថាមានលក្ខណៈស្ថាបនា។ ការចរចាជុំទីពីរគ្រោងធ្វើនៅថ្ងៃសៅរ៍នេះបន្តទៀត។
ក្រុមអ្នកសង្កេតការណ៍បាននិយាយថា លោក Pezeshkianប្រហែលជាបានជៀសវាងការបង្កហេតុដល់ទីក្រុងវ៉ាស៊ីនតោន មុនពេលកិច្ចចរចានាពេលខាងមុខ៕
ដោយ៖ ពេជ្រ
