ជំនួយការរដ្ឋមន្ត្រីការពារជាតិអាមេរិកទទួលបន្ទុកកិច្ចការសាធារណៈ លោក Sean Parnell បាននិយាយថា សហរដ្ឋអាមេរិក នឹងបញ្ចប់ប្រតិបត្តិការរបស់ខ្លួនប្រឆាំងក្រុមហ៊ូធី ប្រសិនបើពួកគេបញ្ឈប់រាល់សកម្មភាពវាយប្រហារលើកប៉ាល់នៅតាមសមុទ្រសំខាន់ៗ ។
លោក Parnell បានប្រាប់អ្នកយកព័ត៌មានថា ក្រុមហ៊ូធី អាចកំណត់ថាពេលបញ្ចប់ការវាយប្រហារនេះ ដោយការបើកផ្លូវដឹកជញ្ជូនតាមសមុទ្រ ហើយត្រូវប្រាកដថាយើងមានសេរីភាពក្នុងការធ្វើសមយុទ្ធនៅតំបន់នោះ។
យោងតាម លោក Alexus Grynkewich ឧត្តមសេនីយឯកនៃកងទ័ពអាកាសសហរដ្ឋអាមេរិក បានលើកឡើងថា ចាប់តាំងពីការចាប់ផ្តើមប្រតិបត្តិការមកយើងវាយប្រហារច្រើនជាង ៣០ គោលដៅ នៅក្នុងប្រទេសយេម៉ែន។ ទោះយ៉ាងណា លោកមិនបានបញ្ជាក់ពីទីតាំងពិតប្រាកដនៃគោលដៅទាំងនេះទេ ប៉ុន្តែថាមិនមានគ្រោះថ្នាក់ដល់ជនស៊ីវិលណាមួយឡើយ។
គួរបញ្ជាក់ថា កាលពីថ្ងៃទី ១៥ ខែមីនា សហរដ្ឋអាមេរិក បានចាប់ផ្តើមធ្វើការវាយប្រហារទ្រង់ទ្រាយធំទៅលើទីតាំងរបស់ពួកហ៊ូធី ក្នុងប្រទេសយេម៉ែន ដោយផ្អែកលើបញ្ជារបស់លោកប្រធានាធិបតី Donald Trump ។ យោងតាមសេចក្តីថ្លែងការណ៍របស់ទីបញ្ជាការកណ្តាលអាមេរិក (CENTCOM) អះអាងថា ប្រតិបត្តិការនេះ មានគោលបំណងការពារផលប្រយោជន៍របស់សហរដ្ឋអាមេរិក និងធានាសុវត្ថិភាពនៃចរាចរណ៍ផ្លូវសមុទ្រ ៕
ដោយ៖ ពេជ្រ
