បេសកជនពិសេសរបស់ប្រធានាធិបតីសហរដ្ឋអាមេរិក លោក Steve Witkoff បានប្រាប់ឲ្យដឹងថា សហរដ្ឋអាមេរិក រក្សាទំនាក់ទំនងជាអចិន្ត្រៃយ៍ជាមួយចក្រភពអង់គ្លេស ន័រវែស បារាំង ហ្វាំងឡង់ និងរដ្ឋអឺរ៉ុបផ្សេងទៀត ទាក់ទងនឹងដំណោះស្រាយជម្លោះអ៊ុយក្រែន ។
លោក បន្តថា យើងកំពុងពិភាក្សាជាមួយបណ្តាប្រទេសនៅអឺរ៉ុប ដែលរួមមានប្រទេសបារាំង អង់គ្លេស ន័រវែស ហ្វាំងឡង់ និងប្រទេសផ្សេងទៀត។
កាលពីចុងសប្តាហ៍មុន អ្នកនាំពាក្យប្រធានាធិបតីរុស្ស៊ី លោក Dmitry Peskov បានប្រកាសថា ប្រធានាធិបតីរុស្ស៊ី លោក Vladimir Putin ជួបពិភាក្សាជាមួយលោក Witkoff ។
អ្នកនាំពាក្យវិមានក្រឹមឡាំង មិនបញ្ជាក់អំពីថាតើជំនួបនោះពិភាក្សាលើប្រធានបទអ្វីនោះទេ។ ជំនួបនេះ ត្រូវបានគេរំពឹងថា ស្វែងរកសន្តិភាព សម្រាប់ជម្លោះនៅអ៊ុយក្រែន ។
ទន្ទឹមនោះ រដ្ឋមន្ត្រីការបរទេសអាមេរិក លោក Marco Rubio បានអះអាងថា បន្ទាប់ពី លោក Witkoff ត្រឡប់ទៅសហរដ្ឋអាមេរិកវិញ មន្ត្រីនៅទីក្រុងវ៉ាស៊ីនតោននឹងវាយតម្លៃឱ្យបានហ្មត់ចត់បន្ថែមទៀតភ្លាមៗ អំពីជំហររបស់រុស្ស៊ី៕
ដោយ៖ ពេជ្រ
