ក្លឹបបាល់ទាត់ Juventus បានសម្រេចចែកផ្លូវជាមួយអ្នកចាត់ការទូទៅ លោក Igor Tudor ហើយ បន្ទាប់ពីកាន់តួនាទីធំនេះបានតែ ៧ខែប៉ុណ្ណោះ។
ការសម្រេចចិត្តដកគ្រូបង្វឹកសញ្ជាតិក្រូអាត វ័យ ៤៣ឆ្នាំរូបចេញពីតំណែង ក្រោយ សេះបង្កង់បានរងបរាជ័យ ក្រោមថ្វីជើងរបស់ Lazio បានធ្វើឱ្យ Juventus ធ្លាក់ទៅលេខរៀងទី៨ ក្នុងលីគ Serie A ជាបណ្តោះអាសន្ន បន្ទាប់ពីចូលដឹកនាំជំនួសកៅអីលោក Thiago Motta កាលពីអំឡុងខែមីនា ឆ្នាំ២០២៥។
Juventus បានចាញ់ Lazio កាលពីថ្ងៃអាទិត្យ វាគឺជាការបរាជ័យលើកទី៣ ជាប់ៗគ្នាគ្រប់កម្មវិធីតែម្តង ក្នុងចំណោម ៨ប្រកួតចុងក្រោយពុំដែលឈ្នះសោះឡើយ។
ក្លឹបសេះបង្កង់មួយនេះ បានតែងតាំងលោក Massimiliano Brambilla ជាអ្នកចាត់ការបណ្តោះអាសន្ន ដើម្បីប្រកួតទល់នឹង Udinese នៅរាត្រីថ្ងៃពុធក្នុង Serie A ស្របពេលនៅ Champions League វិញ ពួកគេស្ថិតនៅលេខរៀងទី២៥ ក្រៅពីចាញ់១ និងស្មើ ២លើក ក្នុងចំណោម ៣ប្រកួតកន្លងមក៕
