អ្នកនាំពាក្យប៉ូលិស បានឱ្យដឹង កាលពីថ្ងៃសុក្រថា រថយន្តក្រុងដឹកអ្នកដំណើរមួយគ្រឿង បើកធ្លាក់ផ្លូវចូលជ្រោះក្នុងតំបន់ភ្នំមួយក្នុងប្រទេសស្រីលង្កា ដោយសម្លាប់មនុស្ស ១៥ នាក់ និង ១៦ នាក់ផ្សេងទៀតរងរបួស។
អ្នកនាំពាក្យប៉ូលិស លោក Fredrick Wootler បាននិយាយថា ឧបទ្ទវហេតុនេះកើតឡើងនៅជិតទីក្រុង Wellawaya ចម្ងាយប្រហែល ២៨០ គីឡូម៉ែត្រ (១៧៤ ម៉ាយ) ភាគខាងកើតនៃរដ្ឋធានីកូឡ៊ុំបូ កាលពីយប់ថ្ងៃព្រហស្បតិ៍។
យោងតាមប៉ូលិស បានបញ្ជាក់ថា រថយន្តក្រុងធ្លាក់ជ្រោះជម្រៅប្រហែល ១,០០០ ហ្វីត សម្លាប់មនុស្ស ១៥ នាក់ និង ១៦នាក់របួស ក្នុងនោះមានកុមារ ៥ នាក់។
លោក Wootler បានបន្ថែមថា ការស៊ើបអង្កេតដំបូងរបស់ប៉ូលិស សន្ឋិដ្ឋានថា រថយន្តក្រុងបើកក្នុងល្បឿនលឿន បណ្ដាលឱ្យបាត់បង់ការគ្រប់គ្រង ដោយបុកជាមួយរថយន្តផ្សេងទៀត និងរបាំងការពារ រួចបន្តធ្លាក់ចូលជ្រោះតែម្ដង។
គ្រោះថ្នាក់រថយន្តក្រុង ធ្លាក់ជ្រោះតែងតែកើតមានក្នុងប្រទេសស្រីលង្កា ជាពិសេសនៅតាមតំបន់ភ្នំ ដែលជារឿយៗបណ្តាលមកពីការបើកបរដោយមិនប្រុងប្រយ័ត្ន និងផ្លូវតូចចង្អៀត៕
ដោយ៖ ពេជ្រ
