ថ្លែងក្នុងសន្និសិទសារព័ត៌មានក្រោយចប់ការប្រកួតជាមួយសិង្ហបុរី លោក Koji Gyotoku គ្រូបង្វឹកក្រុមគោព្រៃកម្ពុជា បាននិយាយថា សិង្ហបុរីបានផ្តល់សម្ពាធយ៉ាងលំបាកដល់យើង ហើយកីឡាកររបស់យើងមួយចំនួនមានការភ័យខ្លាចទើបធ្វើឲ្យការប្រកួតបាត់បង់ការគ្រប់គ្រងជាពិសេសក្នុងការរក្សាបន្ទាត់ការពារជាក្រុម ។ ខ្ញុំគិតថា មិនមែនយើងមិនមានសំណាងនោះទេដែលមិនអាចយកបានយ៉ាងហោចណាស់មួយពិន្ទុ ព្រោះសិង្ហបុរីគេជាក្រុមល្អជាង។
ក្រុមជម្រើសជាតិកម្ពុជា មិនអាចរកបានពិន្ទុឡើយសម្រាប់ការប្រកួតទី២ បន្ទាប់ពីយកចាញ់ម្ចាស់ផ្ទះ សិង្ហបុរី ដោយលទ្ធផល ១-២ វគ្គសន្សំពិន្ទុក្នុងពូល A ពានរង្វាន់ ASEAN Championship នៅប្រទេសសិង្ហបុរី កាលពីយប់មិញ។ លទ្ធផលនេះបានធ្វើឲ្យកម្ពុជាមានសង្ឃឹមតិចតូចប៉ុណ្ណោះក្នុងការឡើងទៅកាន់វគ្គពាក់កណ្តាលផ្តាច់ព្រ័ត្រ ដោយសារការប្រកួត២លើកចុងក្រោយគឺប៉ះ ទីម័រខាងកើត និងចុងក្រោយប៉ះក្រុមខ្លាំងថៃដែលពិបាករកពិន្ទុ៕
