ក្លឹបបាល់ទាត់ភ្នំពេញក្រោន បានឡើងវគ្គចែកពូលពានរង្វាន់លំដាប់ទី៣ទ្វីបអាស៊ី 2025-2026 ក្រោយបំបាក់ក្រុមម្ចាស់ផ្ទះប្រ៊ុយណេ Kasuka FC ដោយលទ្ធផល ៦-០ ក្នុងវគ្គជម្រុះបឋមកាលពីយប់មិញនៅ Hassanal Bolkiah។
យ៉ាងណាមិញក្រោយយកឈ្នះ Kasuka FC លោក Oleg Starynskyi គ្រូបង្វឹកក្លិបបាល់ទាត់ភ្នំពេញក្រោន បាននិយាយថា «ជាដំបូងខ្ញុំអបអរសាទរទៅកាន់អ្នកគាំទ្របាល់ទាត់កម្ពុជា ដែលគាំទ្រពួកយើង។ យើងបានកាន់ទង់ជាតិកម្ពុជាលើឆាកអន្តរជាតិ។ យើងរីករាយដែលបានតំណាងឲ្យកម្ពុជានៅវគ្គចែកពូល។
លោកបន្តថា នៅវគ្គទីមួយ វាពិតជាតានតឹងសម្រាប់យើងព្រោះ Kasuka លេងបានល្អនៅតំបន់ការពារ។ វាពិតជាសំខាន់សម្រាប់យើងក្នុងការបង្កើតតំបន់ទំនេរ ខ្ញុំគិតថាកីឡាករយើងធ្វើបានល្អ។ នៅវគ្គទីពីរ យើងបានបង្កើតឪកាសច្រើន និងបានបំលែងវាទៅជាគ្រាប់បាល់ផងដែរ។ យើងលេងបានល្អជាក្រុម ហើយក៏បានការពារពីតំបន់គ្រោះថ្នាក់ផងដែរ។ ពួកគេមានឪកាសល្អដូចជាមានគ្រាប់បាល់រៀបចំមួយផងដែរ។ សម្រាប់យើង ខ្ញុំរីករាយដែលបានបំលែងឪកាសទាំងនោះទៅជាគ្រាប់បាល់។»
សូមជម្រាបថា ក្លិបភ្នំពេញក្រោន បានក្លាយជាក្លឹបទី២ បន្ទាប់ពីក្លឹបព្រះខ័នរាជស្វាយរៀង ដែលមានវត្តមានក្នុងវគ្គចែកពូលពានរង្វាន់លំដាប់ទី 3 ទ្វីបអាស៊ីឆ្នាំ 2025-2026 ខណៈចាប់ឆ្នោតបែងចែកពូលធ្វើឡើងនៅថ្ងៃទី ២៨ ខែសីហា ឆ្នាំ២០២៥ ខាងមុខនេះ៕
