ទីភ្នាក់ងារព័ត៌មានផ្លូវការរបស់អ៊ីរ៉ាក់ បានរាយការណ៍ថា គ្រាប់រ៉ុក្កែត ២ គ្រាប់ ហោះសំដៅវាយប្រហារតំបន់មូលដ្ឋានទ័ពអាកាស កាលពីល្ងាចថ្ងៃចន្ទ ដែលស្ថិតនៅក្នុងទីក្រុង Kirkuk ភាគខាងជើងនៃប្រទេស ប៉ុន្តែមិនបណ្តាលឱ្យមានអ្នករងរបួសនោះទេ។
ទីភ្នាក់ងារនេះ ដកស្រង់ប្រភពសន្តិសុខជាន់ខ្ពស់ដែលនិយាយថា គ្រាប់រ៉ុក្កែតប្រភេទ Katyusha ចំនួន ២ ត្រូវបានបាញ់លើមូលដ្ឋានអាកាស Kirkuk ។
គ្រាប់រ៉ុក្កែតមួយ បានធ្លាក់នៅចន្លោះផ្លូវរត់ទីមួយ និងទីពីរនៃមូលដ្ឋានទ័ពអាកាស ខណមួយទៀត វាយប្រហារចំអគារលំនៅដ្ឋានមួយក្បែរនោះ។
ប្រភពដដែល បានបញ្ជាក់ថា ការវាយប្រហារនេះមិនបណ្ដាលឲ្យមានមនុស្សស្លាប់ ឬខូចខាតអ្វីធ្ងន់ធ្ងរនោះទេ។
គួរបញ្ជាក់ថា អំឡុងការវាយប្រហាររបស់អ៊ីរ៉ង់លើមូលដ្ឋានទ័ពអាមេរិកនៅកាតា ពេលនោះក៏មានដំណឹងពីការវាយឆ្មក់មួយលើមូលដ្ឋាននៅអ៊ីរ៉ាក់ផងដែរ ប៉ុន្តែមិនដឹងថាក្រុមណាជាអ្នកនៅពីក្រោយនោះទេ ៕
ដោយ៖ ពេជ្រ
