នាយករដ្ឋមន្ត្រីអ៊ីស្រាអែល លោក Benjamin Netanyahu បានអះអាងថា ប្រទេសរបស់លោកមានបំណងគ្រប់គ្រងទាំងស្រុងលើតំបន់ហ្គាហ្សាស្ទ្រីប។
លោក Netanyahu បានបញ្ចេញសារវីដេអូមួយកាលពីថ្ងៃចន្ទ បន្ទាប់ពីអ៊ីស្រាអែលបានចាប់ផ្តើមពង្រីកប្រតិបត្តិការយោធារបស់ខ្លួននៅក្នុងតំបន់ហ្គាហ្សាកាលពីថ្ងៃសុក្រសប្តាហ៍មុន។ លោក បាននិយាយថា អ៊ីស្រាអែលនឹងគ្រប់គ្រងគ្រប់ផ្នែកទាំងអស់នៃតំបន់នេះ ដោយបន្ថែមថា “នោះជាអ្វីដែលយើងនឹងធ្វើ” ។
យោធាអ៊ីស្រាអែលបានឲ្យដឹងថា ខ្លួនបានដាក់ពង្រាយកងទ័ពជើងគោកទៅកាន់ទីតាំងយុទ្ធសាស្ត្រ និងបានធ្វើការវាយប្រហារតាមអាកាសលើគោលដៅជាង ១៦០ រួមទាំងទីតាំងរឹងមាំរបស់ក្រុមហាម៉ាសផងដែរ។
អាជ្ញាធរសុខាភិបាលនៅតំបន់ហ្គាហ្សាកាលពីថ្ងៃចន្ទបាននិយាយថា មនុស្សចំនួន ១៣៦ នាក់ត្រូវបានសម្លាប់ក្នុងរយៈពេល ២៤ ម៉ោងចុងក្រោយនេះ។
អ្នកស្រុកនៅតំបន់ហ្គាហ្សាបាននឹងកំពុងប្រឈមមុខនឹងការខ្វះខាតស្បៀងអាហារយ៉ាងធ្ងន់ធ្ងរ ខណៈដែលអ៊ីស្រាអែលបានបញ្ឈប់ការចូលនៃជំនួយមនុស្សធម៌ចូលទៅក្នុងតំបន់នេះកាលពីខែមីនា។
អ៊ីស្រាអែលក៏បានប្រកាសកាលពីថ្ងៃអាទិត្យថា ការចែកចាយស្បៀងនឹងបន្តឡើងវិញ ប៉ុន្តែបាននិយាយថា ខ្លួននឹងអនុញ្ញាតឲ្យចែកតែក្នុងបរិមាណតិចតួចនៃការផ្គត់ផ្គង់ប៉ុណ្ណោះ។
កាលពីថ្ងៃចន្ទ រថយន្តដឹកជំនួយមនុស្សធម៌របស់អង្គការសហប្រជាជាតិចំនួន ៥គ្រឿង បានចូលក្នុងតំបន់ហ្គាហ្សា។ ប៉ុន្តែគេនៅតែត្រូវមើលថាតើអាហារគ្រប់គ្រាន់នឹងត្រូវបាននាំមកសម្រាប់អ្នកស្រុកជាងពីរលាននាក់ក្នុងតំបន់នេះឬអត់៕
ដោយ៖ ពេជ្រ
