ក្រុមមន្ត្រី បាននិយាយថា ទឹកជំនន់ដែលបណ្តាលមកពីភ្លៀងធ្លាក់ខ្លាំងនៅភាគខាងត្បូងប្រទេសថៃ សម្លាប់មនុស្ស ៩ នាក់ និងជាង ១៣,០០០ នាក់ជម្លៀសចេញ ខណដែលក្រុមជួយសង្គ្រោះប្រើប្រាស់ទូក ដើម្បីសង្គ្រោះមនុស្សដែលជាប់គាំង។
ខ្សែវីដេអូប្រព័ន្ធផ្សព្វផ្សាយក្នុងស្រុក បានបង្ហាញអំពីអ្នកស្រុកដើរកាត់ទឹកដែលមានសភាពជ្រៅ និងមានរថយន្តលិចលង់ផងដែរ។
ទន្ទឹមនោះ ទីភ្នាក់ងារគ្រោះមហន្តរាយរបស់ប្រទេស បានឲ្យដឹង នៅលើទំព័រ Facebook ផ្លូវការថា ទឹកជំនន់នៅទូទាំងខេត្តចំនួន ៨ នៅភាគខាងត្បូង បង្កផលប៉ះពាល់ដល់គ្រួសារចំនួន ៥៥៣,៩២១ និងឆក់យកជីវិតមនុស្ស ៩ នាក់ ដែលជំរុញឱ្យភ្នាក់ងារនានាត្រូវប្រមូលជំនួយជាបន្ទាន់។
របាយការណ៍ បានបន្ថែមថា មនុស្សជាង ១៣,០០០ នាក់ បង្ខំឱ្យភៀសខ្លួនចេញពីផ្ទះរបស់ពួកគេ ទៅទីជម្រកបណ្តោះអាសន្ននៅក្នុងសាលារៀន ។
គួរបញ្ជាក់ថា ប្រទេសថៃរងគ្រោះទឹកជំនន់ធ្ងន់ធ្ងរបំផុត គឺក្នុងឆ្នាំ ២០១១ ដោយបានសម្លាប់មនុស្សជាង ៥០០ នាក់ និងបំផ្លាញផ្ទះរាប់លានខ្នង ៕
ដោយ៖ ពេជ្រ
