ក្រោយចាញ់ព្រះខ័នរាជស្វាយរៀង ៣-0 កាលពីយប់មិញ គ្រូបង្វឹកក្រុម Madura United លោក Angel Alfredo Vera បាននិយាយថា “ថ្ងៃនេះយើងបានលេងទល់ជាមួយក្រុមដែលល្អ ហើយពួកគេរកបាន២គ្រាប់លឿនមែនទែន ពួកយើងនៅសល់៩០នាទីទៀត ដែលប្រកួតនៅក្នុងទឹកដីរបស់យើង ដូច្នេះយើងត្រូវលេងដើម្បីអ្នកគាំទ្ររបស់យើង ហើយយើងសង្ឃឹមថាយ៉ាងហោចណាស់អាចនឹងតាមស្មើលទ្ធផលនេះ ហើយឈ្នះពួកគេ”។
សូមជម្រាបថា ជំនួបកាត់សេចក្ដីជើងទី២ រវាងក្រុម Madura United និងព្រះខ័នរាជស្វាយរៀង នឹងត្រូវធ្វើឡើងនៅប្រទេសឥណ្ឌូនេស៊ីវិញម្ដង នាថ្ងៃទី១៧ ខែមេសា ឆ្នាំ២០២៥ ខាងមុខ ដើម្បីកំណត់ថា ក្រុមណានឹងឡើងទៅវគ្គផ្ដាច់ព្រ័ត្រ នៃពានរង្វាន់កម្រិតទី៣ ប្រចាំទ្វីបអាស៊ីនេះ៕
