ប្រធានគណៈកម្មការអឺរ៉ុប លោកស្រី Ursula von der Leyen បានថ្លែងថា ទីក្រុងព្រុចសែល មានឆន្ទៈក្នុងការចរចាកិច្ចព្រមព្រៀងថ្មីមួយស្តីពីពន្ធគយជាមួយសហរដ្ឋអាមេរិក។
សេចក្តីថ្លែងការណ៍នេះធ្វើឡើងបន្ទាប់ពីប្រធានាធិបតីអាមេរិក លោកDonald Trump បានទះកំផ្លៀងប្លុកជាមួយនឹងពន្ធ ២០% ដែលនឹងចូលជាធរមាននៅថ្ងៃពុធស្អែកនេះ។
លោកស្រី von der Leyen បានប្រាប់សន្និសីទសារព័ត៌មានកាលពីថ្ងៃច័ន្ទថា យើងបានផ្តល់ជូននូវពន្ធសូន្យសម្រាប់ទំនិញឧស្សាហកម្មអាមេរិក។ លោកស្រីថា អឺរ៉ុបតែងតែត្រៀមខ្លួនសម្រាប់កិច្ចព្រមព្រៀងដ៏ល្អ ដូច្នេះយើងរក្សាវានៅលើតុជានិច្ច។
ការផ្តល់ជូននូវពន្ធសូន្យនេះធ្វើឡើងបន្ទាប់ពីកិច្ចប្រជុំរដ្ឋមន្ត្រីពាណិជ្ជកម្មសហភាពអឺរ៉ុបនៅប្រទេសលុចសំបួ។
យោងតាម Reuters ផ្សាយថា ការសម្រេចចិត្តខាងលើនេះគឺមានន័យថាប្លុកនេះនឹងផ្តល់អាទិភាពដល់ការចរចាជាមួយទីក្រុងវ៉ាស៊ីនតោនជាជាងចូលរួមក្នុងសង្គ្រាមពាណិជ្ជកម្ម។
ប្រធានគណៈកម្មាការសហភាពអឺរ៉ុបបាននិយាយថា ប្លុកមានវិធានការផ្សេងទៀតនៅក្នុងកញ្ចប់នៃការចរចានោះ ប្រសិនបើភាគីទាំងសងខាងបរាជ័យក្នុងការឈានដល់កិច្ចព្រមព្រៀងមួយនោះ។លោកស្រីបានថ្លែងថា “យើងក៏បានត្រៀមខ្លួនដើម្បីឆ្លើយតបតាមរយៈវិធានការតបត និងការពារផលប្រយោជន៍របស់យើងផងដែរ ប្រសិនការចរចាបរាជ័យ”។
ការថ្លែងរបស់លោកស្រីត្រូវបានបន្ទរដោយស្នងការសហភាពអឺរ៉ុបទទួលបន្ទុកផ្នែកសន្តិសុខពាណិជ្ជកម្ម និងសេដ្ឋកិច្ចលោក Maros Sefcovic ដែលលោកបានបញ្ជាក់នៅលើ X ថា ប្លុកនេះគឺបានត្រៀមខ្លួនជាស្រេចក្នុងការចរចានៅពេលណាដែលដៃគូអាមេរិករបស់យើងនៅបើកភ្លើងខៀវ។ ប៉ុន្តែក៏កំពុងបន្តការងាររបស់ខ្លួនលើវិធានការតបតផងដែរ ព្រោះយើងមិនអាចនៅស្ងៀមនោះទេ។
រដ្ឋបាលលោក Trump ពីមុនបានណែនាំពន្ធនាំចូល ២៥% លើដែកថែប និងអាលុយមីញ៉ូមរបស់សហភាពអឺរ៉ុប។លោកប្រធានាធិបតីអាមេរិកក៏បានបង្ហាញភាពត្រឹមត្រូវចំពោះគោលនយោបាយនេះដោយនិយាយថាវាកំពុងកំណត់គោលដៅប្រទេសដែលពួកគេដាក់របាំងខ្ពស់សម្រាប់ទំនិញអាមេរិក។
កាលពីសប្តាហ៍មុន សហរដ្ឋអាមេរិកបានអនុវត្តការយកពន្ធលើការនាំចូលដែលមានចាប់ពី ១០% ទៅ ៥០% លើប្រទេសជាង ២០០ដែលខ្លួនយល់ថាកំពុងចូលរួមក្នុងការអនុវត្តពាណិជ្ជកម្មមិនយុត្តិធម៌សម្រាប់អាមេរិក។
កាលពីថ្ងៃចន្ទ ប្រធានាធិបតីអាមេរិក បាននិយាយនៅលើប្រព័ន្ធផ្សព្វផ្សាយសង្គមថា ពន្ធគយកំពុងដំណើរការ ហើយត្រូវបានគេសន្មត់ថាផ្តល់ផលចំណេញសេដ្ឋកិច្ចយ៉ាងសំខាន់សម្រាប់សហរដ្ឋអាមេរិក។ នៅថ្ងៃបន្ទាប់ លោក Trump បានចោទប្រកាន់សហភាពអឺរ៉ុបថាបានប្រព្រឹត្តចំពោះសហរដ្ឋអាមេរិកដ៏អាក្រក់។ លោកបន្ថែមថាទីក្រុងព្រុចសែលមានឆន្ទៈក្នុងការកម្ចាត់ពន្ធឥឡូវនេះ។ លោកបញ្ជាក់បន្ថែមថា សម្បទានដែលផ្តល់ដោយប្លុកនេះមិនទាន់គ្រប់គ្រាន់នោះទេ។
លោក Trump បាននិយាយថា “វាមិនត្រឹមតែពន្ធប៉ុណ្ណោះទេ វាមិនមែនជាពន្ធរូបិយវត្ថុទេ”។ លោកថា អាជ្ញាធរសហភាពអឺរ៉ុបបង្កើតច្បាប់ និងបទប្បញ្ញត្តិដែលត្រូវបានរចនាឡើងសម្រាប់ហេតុផលមួយដែលអ្នកមិនអាចលក់ផលិតផលរបស់អ្នកនៅក្នុងប្រទេសទាំងនោះ ហើយយើងនឹងមិនអនុញ្ញាតឱ្យវាកើតឡើងបន្តទៀតនោះទេ៕
ដោយ៖ ពេជ្រ
