ការសម្រេចចិត្តរបស់ប្រធានាធិបតីអាមេរិក ដូណាល់ ត្រាំ ក្នុងការផ្អាកជំនួយយោធាដល់អ៊ុយក្រែន បានធ្វើឱ្យមានការភ្ញាក់ផ្អើលជុំវិញពិភពលោក។ ការសម្រេចនោះបានជំរុញសម្ព័ន្ធមិត្តរបស់អ៊ុយក្រែនបង្ហាញពីការតាំងចិត្តថ្មី ហើយវាបានជំរុញឱ្យមានការព្រួយបារម្ភយ៉ាងខ្លាំងពីអ្នកដែលស្ថិតនៅក្នុងការឈ្លានពានរបស់រុស្ស៊ី។
ប្រជាជននៅក្នុងរដ្ឋធានី Kyiv របស់អ៊ុយក្រែនមានការស្រងាកចិត្តចំពោះការសម្រេចចិត្តពីប្រទេសដែលធ្លាប់ជាសម្ព័ន្ធមិត្តដ៏រឹងមាំ។ បុរសម្នាក់បាននិយាយថា “ខ្ញុំមានអារម្មណ៍មិនល្អចំពោះមិត្តភ័ក្តិរបស់ខ្ញុំដែលឈប់ផ្តល់ជំនួយបន្ទាន់បែបនោះ ហើយខ្ញុំគ្រាន់តែចង់ឲ្យពួកគេនៅបន្តផ្តលយជំនួយ។
ប្រធានាធិបតីអ៊ុយក្រែនលោក Volodymyr Zelenskyy បានសរសេរនៅលើ X កាលពីថ្ងៃអង្គារថាលោកមានឆន្ទៈដើម្បីធ្វើឱ្យរឿងត្រឹមត្រូវប៉ុណ្ណោះជាមួយសហរដ្ឋអាមេរិក។ លោកបានហៅកិច្ចប្រជុំដ៏ច្របូកច្របល់កាលពីសប្តាហ៍មុនជាមួយលោក Trump ថា “គួរឱ្យសោកស្តាយ” ដោយបន្ថែមថាលោកបានត្រៀមខ្លួនជាស្រេចដើម្បីចុះហត្ថលេខាលើកិច្ចព្រមព្រៀងមួយដើម្បីផ្តល់ឱ្យសហរដ្ឋអាមេរិកនូវលទ្ធភាពទទួលបានធនធានធម្មជាតិរបស់អ៊ុយក្រែន។
មេដឹកនាំនៅអឺរ៉ុបនិយាយថាការគាំទ្ររបស់ពួកគេនៅតែមានស្ថិរភាពចំពោះគៀវ។ ប្រធានគណៈកម្មការអឺរ៉ុបលោកស្រី Ursula von der Leyen បាននិយាយកាលពីថ្ងៃអង្គារថា “អឺរ៉ុបត្រៀមខ្លួនជាស្រេចក្នុងការបង្កើនការចំណាយលើវិស័យការពារជាតិរបស់ខ្លួន ទាំងដើម្បីឆ្លើយតបទៅនឹងភាពបន្ទាន់រយៈពេលខ្លីដើម្បីធ្វើសកម្មភាព និងគាំទ្រអ៊ុយក្រែន ប៉ុន្តែក៏ដើម្បីដោះស្រាយតម្រូវការរយៈពេលវែងក្នុងការទទួលខុសត្រូវបន្ថែមទៀតសម្រាប់សន្តិសុខអឺរ៉ុបរបស់យើងផ្ទាល់ផងដែរ”។
លោកស្រី Von der Leyen បានប្រកាសអំពីមូលនិធិការពារជាតិដែលនឹងមានចំនួន 800 ពាន់លានអឺរ៉ូ ឬប្រហែល 840 ពាន់លានដុល្លារ។ លោកស្រីបាននិយាយថាមេដឹកនាំសហភាពអឺរ៉ុបនឹងបើកកិច្ចប្រជុំបន្ទាន់មួយនៅថ្ងៃព្រហស្បតិ៍ដើម្បីពិភាក្សាលម្អិតលើបញ្ហានេះ។
មេដឹកនាំនៅក្នុងប្រទេសរុស្ស៊ីបានស្វាគមន៍ការសម្រេចចិត្តរបស់លោក Trump ។ អ្នកនាំពាក្យវិមានក្រឹមឡាំង លោក Dmitry Peskov បានពណ៌នាថា វាជាការរួមចំណែកដ៏ល្អបំផុតចំពោះបុព្វហេតុសន្តិភាព៕
ដោយ៖ ពេជ្រ
