ប្រធានាធិបតីរុស្ស៊ីលោក វ្ល៉ាឌីមៀ ពូទីន កាលពីថ្ងៃព្រហស្បតិ៍ បាននិយាយអះអាងថា មិនមែនគ្រប់គ្នាសុទ្ធតែពេញចិត្តទេ ជាមួយនឹងការស្តារទំនាក់ទំនងរវាងរុស្ស៊ី-អាមេរិកទ្បើងវិញដែលបានចាប់ផ្តើមនាពេលថ្មីៗនេះ សំដៅធ្វើឱ្យមានទំនាក់ទំនងធម្មតាឡើងវិញ។ ប៉ុន្តែមានការប៉ុនប៉ងដោយ ឥស្សរជនលោកខាងលិច ដើម្បីរំខានដល់ដំណើរការនោះ។
ថ្លែងនៅទីស្នាក់ការកណ្តាលនៃសេវាសន្តិសុខសហព័ន្ធរុស្ស៊ីក្នុងទីក្រុងមូស្គូក្នុងឱកាសនៃទិវាកងកម្លាំងប្រតិបត្តិការពិសេស លោកពូទីនបានសរសើរវិធីសាស្រ្តរបស់រដ្ឋបាលប្រធានាធិបតីអាមេរិកលោក Donald Trump លើកិច្ចការពិភពលោក។ លោកនិយាយថា ដៃគូអាមេរិកបច្ចុប្បន្នបង្ហាញពីភាពជាក់ស្តែង និងវិធីសាស្រ្តជាក់ស្តែង ហើយផ្លាស់ប្តូរលើសពីការគិតទុកជាមុន និងគួរឲ្យសរសើរ។
មេដឹកនាំរុស្ស៊ីបាននិយាយថា ទីក្រុងមូស្គូបានត្រៀមខ្លួនរួចជាស្រេចសម្រាប់កិច្ចចរចាសន្តិភាពស្តីពីដំណោះស្រាយអ៊ុយក្រែន ក៏ដូចជាសម្រាប់ទំនាក់ទំនងកាន់តែទូលំទូលាយ រួមទាំងជាមួយអឺរ៉ុបលើប្រព័ន្ធសន្តិសុខរួមដែលគិតគូរពីផលប្រយោជន៍របស់ភាគីទាំងអស់រួមទាំងរុស្ស៊ីផងដែរ។
តាមការកត់សម្គាល់របស់លោកពូទីនបានធ្វើឡើងនៅពេលដែលភាគីអាមេរិក និងរុស្ស៊ីបានជួបពិភាក្សាគ្នានៅទីក្រុងអ៊ីស្តង់ប៊ុលស្តីពីការរំពឹងទុកនៃការដកចេញនូវឧបសគ្គក្នុងការងារបេសកកម្មការទូត។
លោក ពូ ទីន ក៏បានណែនាំសេវាស៊ើបការណ៍សម្ងាត់ឱ្យរារាំងឲ្យខាងតែបាននូវការប៉ុនប៉ងរបស់ពួកឥស្សរជនលោកខាងលិចដែលបានលូកដៃមកជ្រៀតជ្រែកក្នុងកិច្ចសន្ទនារវាងទីក្រុងម៉ូស្គូ និងវ៉ាស៊ីនតោន។
លោកក៏បានឲ្យដឹងដែរថា សកម្មភាពនៃសេវាចារកម្មបរទេសក្នុងប្រទេសរុស្ស៊ីបានកើនឡើងបន្ទាប់ពីការចាប់ផ្តើមជម្លោះរវាងរុស្ស៊ី និងអ៊ុយក្រែន៕
ដោយ៖ ពេជ្រ
