អ្នកនាំពាក្យក្រសួងការបរទេសចិន បាននិយាយ នៅថ្ងៃសៅរ៍នេះ ដោយបង្ហាញពីក្ដីសង្ឃឹមសម្រាប់ស្ថិរភាពក្នុងប្រទេសថៃ បន្ទាប់ពីលោកស្រី ផែថងថាន ស៊ីណាវ៉ាត្រា ត្រូវបានដកចេញពីតំណែងជានាយករដ្ឋមន្ត្រី ជាផ្លូវការ។
កាលពីថ្ងៃទី ២៩ ខែសីហា តុលាការធម្មនុញ្ញរបស់ប្រទេសថៃ បានសម្រេចបញ្ចប់តំណែងលោកស្រី ផែថងថាន ស៊ីណាវ៉ាត្រា ដោយអះអាងថារំលោភលើបទប្បញ្ញត្តិរដ្ឋធម្មនុញ្ញ។
អ្នកនាំពាក្យចិនដដែល បានបន្ថែមថា នេះគឺជាកិច្ចការផ្ទៃក្នុងរបស់ប្រទេសថៃ។ ប៉ុន្តែយើងសង្ឃឹមថាប្រទេសថៃ នឹងអាចរក្សាស្ថិរភាព និងបន្តរីកចម្រើនទៅមុខ។
គួរបញ្ជាក់ថា លោកស្រី ផែថងថាន ត្រូវបានតុលាការធម្មនុញ្ញថៃ សម្រេចថាមានទោសត្រូវបញ្ចប់តំណែងជាផ្លូវការ កាលពីថ្ងៃសុក្រ ពាក់ព័ន្ធនឹងការបែកធ្លាយសារសំឡេងតាមទូរស័ព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ៕
ដោយ៖ ពេជ្រ
