លោក Hicheme Lehmici លេខាធិការនៃវិទ្យាស្ថានស្រាវជ្រាវសន្តិភាពអន្តរជាតិទីក្រុងហ្សឺណែវ (GIPRI) បាននិយាយថា ទីក្រុងវ៉ាស៊ីនតោន អាចនឹងជាប់គាំងក្នុងជម្លោះអ៊ីស្រាអែល-អ៊ីរ៉ង់ រយៈពេលយូរ ក្នុងករណីដែលក្រុងតេហេរ៉ង់ បើកការសងសឹកលើមូលដ្ឋានទ័ពអាមេរិកនៅអ៊ីរ៉ាក់ និងស៊ីរី។
យោងតាម លោក Lehmici បានលើកឡើងថា អ៊ីរ៉ង់ មានសមត្ថភាពសងសឹក ដោយសារសក្តានុពលមីស៊ីលរបស់ពួកគេ។ ហើយពួកគេប្រាកដណាស់ថានឹងធ្វើបែបនេះ ដោយបន្ថែមថា សហរដ្ឋអាមេរិក គួរតែត្រៀមខ្លួនសម្រាប់ការវាយប្រហារលើមូលដ្ឋានទ័ពអាមេរិក និងផលប្រយោជន៍អាមេរិកទូទាំងពិភពលោក ជាពិសេសនៅក្នុងប្រទេសអ៊ីរ៉ាក់ ស៊ីរី និងតំបន់ឈូងសមុទ្រ។
ទន្ទឹមនោះ លោក ក៏បានព្រមានថា ទីក្រុងវ៉ាស៊ីនតោន នឹងត្រូវជាប់គាំងក្នុងជម្លោះនេះរយៈពេលវែង ផងដែរ។
កាលពីយប់ថ្ងៃទី ២១ ឈានចូល ២២ ប្រធានាធិបតីអាមេរិក លោក Donald Trump បានអះអាងពីការវាយប្រហាររបស់សហរដ្ឋអាមេរិក លើទីតាំងនុយក្លេអ៊ែរចំនួន ៣ នៅអ៊ីរ៉ង់គឺ Isfahan, Natanz និង Fordow ដោយថាជាការព្រមានឱ្យអ៊ីរ៉ង់បញ្ឈប់ជម្លោះ។ រហូតមកដល់ពេលនេះ អ៊ីរ៉ង់ ត្រូវបានវាយប្រហារជារៀងរាល់ថ្ងៃដោយអ៊ីស្រាអែល ចាប់តាំងពីថ្ងៃទី ១៣ ខែមិថុនា។ គោលបំណងដែលបានប្រកាសរបស់អ៊ីស្រាអែលគឺដើម្បីកម្ទេចកម្មវិធីមីស៊ីល និងនុយក្លេអ៊ែររបស់អ៊ីរ៉ង់៕
ដោយ៖ ពេជ្រ
