ប្រធានាធិបតីអាមេរិក លោក ដូណាល់ ត្រាំ បាននិយាយថា ចំណុចភាគច្រើននៃកិច្ចព្រមព្រៀងដែលអាចកើតមាន ស្តីពីការដោះស្រាយជម្លោះរវាងរុស្ស៊ី និងអ៊ុយក្រែន ត្រូវបានយល់ព្រម ដោយបន្ថែមថា ភាគីទាំង ២ នៅពេលនេះ អាចចាប់ផ្ដើមកិច្ចប្រជុំមួយក្នុងកម្រិតខ្ពស់បំផុតណាមួយ។
លោក ត្រាំ បានសរសេរនៅលើទំព័រ Truth Social ថា ថ្ងៃដ៏ល្អនៅក្នុងកិច្ចពិភាក្សា និងកិច្ចប្រជុំជាមួយរុស្ស៊ី និងអ៊ុយក្រែន។ ភាគីទាំង ២ អាចឈានដល់កិច្ចព្រមព្រៀងមួយ ហើយភាគីទាំង ២ គួរតែចាប់ផ្ដើមកិច្ចប្រជុំទល់មុខ ដើម្បីសម្រេចវា។
លោក បានបន្ថែមថា សហរដ្ឋអាមេរិក នឹងឈរចាំមើល ដើម្បីជួយសម្រួលដល់ការបញ្ចប់ជម្លោះនេះ ផងដែរ។
គួរបញ្ជាក់ថា ការលើកឡើងរបស់លោក ត្រាំ ខាងលើនេះ កើតឡើងបន្ទាប់ពីជំនួបលើកទី ៤ រវាងប្រធានាធិបតីរុស្ស៊ី វ្ល៉ាឌីមៀ ពូទីន និងបេសកជនពិសេសប្រធានាធិបតីអាមេរិក លោក Steve Witkoff បានប្រព្រឹត្តទៅ កាលពីថ្ងៃសុក្រ៕
ដោយ៖ ពេជ្រ
