ប្រធានាធិបតីអាមេរិក លោក ដូណាល់ ត្រាំ បានថ្លែងឲ្យដឹងថា លោកកំពុងបង្កើនសម្ពាធលើអ៊ុយក្រែន និងរុស្ស៊ី ដើម្បីឲ្យពួកគេយល់ព្រមលើផែនការសន្តិភាពមួយ។ ការលើកឡើងរបស់លោកបានធ្វើឡើងបន្ទាប់ពីមានការវាយប្រហារដ៏ធំរបស់រុស្ស៊ីលើក្រុងគៀវ។
ក្នុងអំឡុងកិច្ចពិភាក្សាជាមួយនាយករដ្ឋមន្ត្រីន័រវេស លោក Jonas Gahr Store នៅសេតវិមានកាលពីថ្ងៃព្រហស្បតិ៍ លោក Trump បាននិយាយថា លោកមាន “ពេលវេលាកំណត់” ផ្ទាល់ខ្លួនសម្រាប់ការចរចាបទឈប់បាញ់ ហើយបានជំរុញឱ្យភាគីទាំងពីរទទួលយកសំណើរបស់សហរដ្ឋអាមេរិក។
លោកបានបញ្ជាក់ថា យើងកំពុងគិតយ៉ាងមុតមាំថា ពួកគេទាំងពីរចង់បានសន្តិភាព ប៉ុន្តែពួកគេត្រូវតែឈានដល់តុចរចា ហើយយើងរង់ចាំពួកគេយូរហើយដែរ ដូច្នេះពួកគេត្រូវតែទៅតុចរចា ហើយខ្ញុំគិតថាយើងនឹងទទួលបានសន្តិភាព។
គួររំលឹកថា ការវាយប្រហាររបស់រុស្សីពេញមួយយប់ដែលពាក់ព័ន្ធនឹងកាំជ្រួចនិងយន្តហោះគ្មានមនុស្សបើកបានបណ្តាលឲ្យមនុស្ស ១២ នាក់ស្លាប់ និង ៩០ នាក់រងរបួស។
ស្ត្រីម្នាក់នៅទីក្រុង Kyiv បានពណ៌នាអំពីការវាយប្រហារដោយនិយាយថា “កាំជ្រួចមួយបានហោះចូល និងធ្វើឱ្យរន្ធនៅលំនៅដ្ឋានរបស់អ្នកជិតខាងរងការខូចខាត។ គាត់បន្តថា ខ្ញុំបានឃើញជីដូនចំណាស់ម្នាក់បានស្លាប់។ ខ្ញុំមិនយល់ថាហេតុអ្វីបានជា Trump មានទំនាក់ទំនងល្អជាមួយពូទីន ដែលជាឃាតកនោះទេ”។
ប្រព័ន្ធផ្សព្វផ្សាយលោកខាងលិចបានរាយការណ៍ថា រដ្ឋបាល Trump បានបង្ហាញសំណើសន្តិភាពដល់អ៊ុយក្រែន ដែលរួមមានសក្តានុពលក្នុងការទទួលស្គាល់ការបញ្ចូលឧបទ្វីបគ្រីមេរបស់រុស្ស៊ីក្នុងឆ្នាំ ២០១៤ ។
ប៉ុន្តែប្រធានាធិបតីអ៊ុយក្រែនលោក Volodymyr Zelenskyy បាននិយាយថា លោកបានដាក់សំណើតបតមួយក្នុងអំឡុងពេលសន្និសីទសារព័ត៌មានស្តីពីដំណើរទស្សនកិច្ចទៅកាន់ទីក្រុង Pretoria ប្រទេសអាហ្វ្រិកខាងត្បូង។
មេដឹកនាំអ៊ុយក្រែនបាននិយាយថា “បន្ទាប់ពីសំណើរបស់សហរដ្ឋអាមេរិក ឯកសារផ្សេងទៀតបានលេចចេញ ហើយខ្ញុំជឿថា ថ្ងៃនេះ ទម្រង់នេះ ឯកសារនេះគឺនៅលើតុរបស់ប្រធានាធិបតី Trump ។ លោកថា អ្វីក៏ដោយដែលផ្ទុយពីតម្លៃរបស់យើង ឬរដ្ឋធម្មនុញ្ញរបស់យើង មិនអាចស្ថិតនៅក្នុងកិច្ចព្រមព្រៀងណាមួយឡើយ” ។ ឥឡូវនេះការយកចិត្តទុកដាក់គឺផ្តោតលើរបៀបដែលការវាយប្រហារចុងក្រោយបំផុតរបស់រុស្ស៊ីនឹងប៉ះពាល់ដល់ការចរចាណាមួយ៕
ដោយ៖ ពេជ្រ
