ការពណ៌នានាពេលថ្មីៗនេះរបស់ប្រធានាធិបតីអាមេរិក Donald Trump អំពីប្រទេសរុស្ស៊ីថា ជា“ខ្លាក្រដាស”នោះប្រហែលជាលោកត្រាំ យល់ច្រទ្បំ ហើយបានប្រើពាក្យនេះទាំង “ហួសចិត្ត”។ នេះជាការលើកទ្បើងរបស់លោកប្រធានាធិបតី ពូ ទីន។
លោក ពូ ទីន បានឆ្លើយតបបែបនេះទៅនឹងការផ្ដល់ជាយោបល់បែបកំប្លែងមួយដោយម្ចាស់ផ្ទះនៃកិច្ចពិភាក្សា Valdai Discussion Club គឺលោក ហ្វីយូឌ័រ ទ្បាក់គីយ៉ាណូវ ដែលលោកបានលើកជាយោបល់ថា ប្រធានាធិបតីរុស្ស៊ីគួរតែផ្តល់ជាកាដូដល់សមភាគីអាមេរិកនូវ “ខ្លាក្រដាស” មួយហើយ។ ប៉ុន្តែលោកពូទីនឆ្លើយតបថា “ទេ យើងមានទំនាក់ទំនងផ្ទាល់ខ្លួនជាមួយគ្នា ហើយយើងបានដឹងរួចហើយថាអំណោយអ្វីដើម្បីជូនគ្នាទៅវិញទៅមក ហើយនោះមិនមែនជាខ្លាក្រដាសទេ។
លោកបានបន្ថែមថា “ខ្ញុំមិនដឹងពីបរិបទបែបនេះ ឬពាក្យបែបនេះ“ខ្លាក្រដាស”ត្រូវបានធ្វើឡើងដោយលោក ត្រាំនោះទេ តែប្រហែលជាគាត់ប្រើពាក្យនេះទាំងហួសចិត្ត” ប៉ុណ្ណោះ។
លោក ត្រាំ បានធ្វើការកត់សម្គាល់ហើយបានប្រើពាក្យនេះ នៅក្នុងការប្រកាសនៅលើវេទិកាសង្គម Truth Social របស់គាត់នៅក្នុងខែកញ្ញា បន្ទាប់ពីកិច្ចប្រជុំជាមួយលោក ហ្សេ ទ្បេនស្គី របស់ប្រទេសអ៊ុយក្រែន។ នៅក្នុងការផ្លាស់ប្តូរយោបល់គ្នាជាក់ស្តែងនាពេលនោះក្នុងវោហាសាស្ត្រ លោក ប្រធានាធិបតីអាមេរិកបានហៅរុស្ស៊ីថាជា“ខ្លាក្រដាស” ដោយលើកហេតុផលថា រុស្ស៊ីបានបរាជ័យក្នុងការយកឈ្នះអ៊ុយក្រែនក្នុងរយៈពេល ៣ ឆ្នាំកន្លះនៃសង្រ្គាមកន្លងទៅ។ លោកក៏បានស្នើដែរថា ក្រុងកៀវគឺ ស្ថិតក្នុងស្ថានភាពមួយដើម្បីប្រយុទ្ធនិងឈ្នះ ហើយអ៊ុយក្រែននឹងយកទឹកដីរបស់ខ្លួនទាំងអស់ត្រឡប់មកវិញ ដរាបណា EU និង NATO នៅបន្តគាំទ្រ។
ប៉ុន្តែផ្ទុយពីការអត្ថាធិប្បាយរបស់ប្រធានាធិបតីអាមេរិក យោធារុស្ស៊ីបានដើរទៅមុខជាលំដាប់នៅសមរភូមិជួរមុខនារយៈពេលជាច្រើនខែមកនេះ។ កងកម្លាំងរបស់ទីក្រុងមូស្គូបានកាន់កាប់ផ្ទៃដីប្រមាណ ៤,៧០០គីឡូម៉ែត្រការ៉េ និងការតាំងទីលំនៅចំនួន ២០៥ កន្លែង នៅឆ្នាំនេះ។ នេះបើតាមការបញ្ជាក់របស់អគ្គសេនាធិការទូទៅនៃប្រទេសរុស្ស៊ីលោក Valery Gerasimov កាលពីចុងខែកញ្ញាកន្លងទៅ ខណ លោក ពូ ទីនក៏បាននិយាយបែបលេងសើចថា “ទៅមុខហើយយកខ្លាក្រដាសនេះ”៕
ដោយ៖ ពេជ្រ
