ប្រព័ន្ធផ្សព្វផ្សាយកូរ៉េខាងត្បូងរាយការណ៍ថា ប៉ូលីសបាបបិទបញ្ចប់ការស៊ើបអង្កេតលើករណីពាក់ពន្ធ័នឹងលោកប្រធានាធិបតី ហើយគេរំពឹងថា ការចោទប្រកាន់ពីបទបះបោរប្រឆាំងនឹងប្រធានាធិបតី Yoon Suk-yeol អាចនឹងកើតមាន។ លោក Yoon បានប្រកាសយ៉ាងខ្លីនូវច្បាប់អាជ្ញាសឹកកាលពីថ្ងៃអង្គារសប្តាហ៍មុន ដោយធ្វើឱ្យប្រទេសនេះធ្លាក់ចូលទៅក្នុងភាពវឹកវរ។
អាជ្ញាធរបាននិយាយកាលពីថ្ងៃពុធថា ពួកគេបានព្យាយាមធ្វើការរុករកការិយាល័យប្រធានាធិបតី ប៉ុន្តែត្រូវបានរារាំងដោយមន្ត្រីសន្តិសុខ។ បន្ទាប់ពីការឈរតវ៉ាអស់រយៈពេលជិតប្រាំបីម៉ោង ពួកគេអាចទទួលបានឯកសារមួយចំនួនដែលការិយាល័យរបស់ Yoon បានដាក់ជូនដោយស្ម័គ្រចិត្ត។
ប៉ូលិសបានចាត់ទុកលោក Yoon ជាជនសង្ស័យសម្រាប់ការចោទប្រកាន់ពីបទបះបោរ។ នៅក្នុងប្រទេសកូរ៉េខាងត្បូង ប្រធានាធិបតីមិនអាចត្រូវបានកាត់ទោសនៅពេលកំពុងកាន់តំណែងនោះទេ ប៉ុន្តែឧក្រិដ្ឋកម្មនៃការបះបោរត្រូវបានចាត់ទុកថាជាករណីលើកលែង និងត្រូវប្រឈមការកាត់ទោស។
តាមរបាយការណ៍បានឲ្យដឹងថា មួយថ្ងៃមុនការប្រកាសឲ្យប្រើច្បាប់អាជ្ញាសឹក លោក Yoon បានបើកកិច្ចប្រជុំគណៈរដ្ឋមន្ត្រីមួយភ្លាមៗ។ នៅក្នុងកិច្ចប្រជុំនោះនាយករដ្ឋមន្ត្រី Han Duck-soo បាននិយាយថា មនុស្សគ្រប់រូបនៅក្នុងកិច្ចប្រជុំបានសម្តែងការប្រឆាំងទៅនឹងសេចក្តីប្រកាសនេះ។ ប៉ុន្តែលោក Yoon មិនព្រមស្តាប់នោះទេ។
សូមជម្រាបថា គណបក្សប្រឆាំងគ្រោងនឹងដាក់សំណើមួយផ្សេងទៀតដើម្បីចោទប្រកាន់លោក Yoon នៅសប្តាហ៍នេះបន្ទាប់ពីការប៉ុនប៉ងបរាជ័យនាពេលថ្មីៗនេះ។ ការបោះឆ្នោតមួយត្រូវបានរំពឹងទុកនៅថ្ងៃសៅរ៍ខាងមុខនេះ។ សមាជិកគណបក្សអំណាចប្រជាជនមួយចំនួនបានលើកឡើងថា លើកនេះនឹងបោះឆ្នោតគាំទ្រចលនានេះដើម្បីផ្តន្ទាទោសលោក Yoon។
សមាជិកសភាគណបក្សកាន់អំណាច លោក Kim Jae-sub បាននិយាយនៅក្នុងសន្និសីទសារព័ត៌មានមួយថា លោកជឿថា Yoon គួរតែត្រូវបានចោទប្រកាន់ ដោយលោកបញ្ជាក់ថា “នេះគឺជាវិធីដែលវាត្រឹមត្រូវតាមរដ្ឋធម្មនុញ្ញរបស់ប្រទេសកូរ៉េខាងត្បូង”។យ៉ាងណាក៏ដោយ សេចក្តីព្រាងច្បាប់នេះ ត្រូវការការគាំទ្រពីសមាជិកបក្សកាន់អំណាចយ៉ាងតិចប្រាំបីទ្បើង ដើម្បីអនុម័ត។
ប្រព័ន្ធផ្សព្វផ្សាយក្នុងស្រុកបានរាយការណ៍ថា យ៉ាងហោចណាស់សមាជិក ៥ នាក់ហើយដែលបានសម្តែងនូវការគាំទ្រចំពោះសេចក្តីព្រាងច្បាប់នេះ ហើយនឹងមានសមាជិកសភាផ្សេងទៀតផងដែរ៕
ដោយ៖ ពេជ្រ
