លោក Han Dong-hoon មេដឹកនាំគណបក្សអំណាចប្រជាជន (PPP) បាននិយាយ កាលពីថ្ងៃព្រហស្បតិ៍ថា លោកនឹងខិតខំប្រឹងប្រែង ដើម្បីបង្រួបបង្រួមគណបក្សរបស់លោក ដើម្បីរារាំងការអនុម័តនៃចលនាដឹកនាំដោយគណបក្សប្រឆាំងដែលចោទប្រកាន់លោកប្រធានាធិបតី Yoon Suk Yeol ។
លោក Han បានធ្វើការកត់សម្គាល់នេះ បន្ទាប់ពីគណបក្សប្រឆាំងដ៏ធំរបស់គណបក្សប្រជាធិបតេយ្យ (DP) និងគណបក្សតូចៗចំនួន ៥ ផ្សេងទៀត ប្រកាសអំពីចលនាចោទប្រកាន់លើការប្រកាសច្បាប់អាជ្ញាសឹកដែលសភាទើបតែបោះឆ្នោតដកចេញនាពេលថ្មីៗនេះរបស់លោក Yoon កាលពីព្រឹកថ្ងៃព្រហស្បតិ៍។
លោក Han បានលើកឡើង ក្នុងពេលប្រជុំបក្សថា ក្នុងនាមជាមេបក្ស ខ្ញុំនឹងធ្វើការដើម្បីធានាថាការចោទប្រកាន់នេះមិនកើតឡើង ដើម្បីការពារពីភាពចលាចលដែលមិនទាន់ត្រៀមខ្លួនសម្រាប់សាធារណជន និងអ្នកគាំទ្រ ។
ទន្ទឹមនោះ លោក ក៏បានបញ្ជាក់ថា ការសម្រេចចិត្តនេះគឺមិនមែនការពារច្បាប់អាជ្ញាសឹកដែលមិនស្របតាមរដ្ឋធម្មនុញ្ញរបស់លោក Yoon នោះទេ ពោលគឺមិនចង់ឲ្យប្រធានាធិបតីចាកចេញពីបក្ស ប៉ុណ្ណោះ។
សំណើចោទប្រកាន់ដែលដាក់ចេញដោយសមាជិកសភាបក្សប្រឆាំងចំនួន ១៩១ រូប ទាមទារសំឡេងភាគច្រើន ២ភាគ៣ ដើម្បីអនុម័តសភា។ ក្នុងចំណោមសមាជិករដ្ឋសភាចំនួន ៣០០នាក់ គណបក្សប្រឆាំងនឹងត្រូវការសំឡេងចំនួន ៨ ពីសមាជិកសភា PPP ដើម្បីអនុម័តច្បាប់នេះ។
ជាការឆ្លើយតប មេដឹកនាំបក្ស DP លោក Lee Jae-myung បានរំលឹកឡើងវិញនូវការប្តេជ្ញាចិត្តយ៉ាងមុតមាំរបស់លោក ក្នុងការចោទប្រកាន់លោក Yoon ដោយពណ៌នាការប្រកាសច្បាប់អាជ្ញាសឹកថាជាការប៉ុនប៉ងធ្វើរដ្ឋប្រហារដោយពួកអ្នកស្មោះត្រង់ដែលស្រមៃមើលរបបរាជានិយមជាក់ស្តែង ។
លោក Lee បានលើកឡើង នៅក្នុងកិច្ចប្រជុំបក្សមួយថា លោក Yoon ព្យាយាមប្រើអំណាចទាំងស្រុងក្នុងនាមជាស្តេច ឬព្រះមហាក្សត្រដាច់ខាត ដោយដាក់ស្ថាប័នរដ្ឋធម្មនុញ្ញ និងជាតិទាំងអស់ឱ្យស្ថិតនៅក្រោមការគ្រប់គ្រងរបស់លោក ។
ជាមួយគ្នានោះ លោក Lee ក៏បានជំរុញឱ្យ លោក Han ទទួលយកទំនួលខុសត្រូវប្រវត្តិសាស្ត្រដោយដឹកនាំគណបក្សកាន់អំណាច មិនឱ្យក្លាយជាអ្នកសមគំនិតក្បត់ជាតិទេ ៕
ដោយ៖ ពេជ្រ
