នាយករដ្ឋមន្ត្រីឥណ្ឌា លោក Narendra Modi បាននិយាយថា ប្រទេសលោក នឹងឆ្លើយតបយ៉ាងខ្លាំង ចំពោះអ្វីដែលលោក ពណ៌នាថាជាការវាយប្រហារភេរវកម្ម នាពេលអនាគត បន្ទាប់ពីការបាញ់តបតគ្នាទៅវិញទៅមករយៈពេល ៤ ថ្ងៃ ជាមួយប្រទេសប៉ាគីស្ថាន។
លោក Modi បានលើកឡើង នៅក្នុងសុន្ទរកថាជាសាធារណៈលើកដំបូងរបស់លោក ថានេះមិនមែនជាយុគសម័យនៃសង្គ្រាមទេ ហើយក៏មិនមែនជាសម័យនៃភេរវកម្មដែរ ។
ការថ្លែងរបស់លោក Modi នេះគឺបន្ទាប់ពីការវាយប្រហាររបស់ក្រុមសកម្មប្រយុទ្ធនៅតំបន់កាស្មៀរគ្រប់គ្រងដោយឥណ្ឌា ដែលសម្លាប់មនុស្ស ២៦ នាក់ ដែលឥណ្ឌា ប្រកាន់ក្រុមដែលមានមូលដ្ឋាននៅប៉ាគីស្ថាន។
ទោះជាយ៉ាងណា ទីក្រុងអ៊ីស្លាម៉ាបាដ បានបដិសេធយ៉ាងដាច់អហង្ការ ចំពោះការចោទប្រកាន់ទាំងអស់នេះ ។
បទឈប់បាញ់ដែលអាមេរិក បានព្រមព្រៀងគ្នារវាងភាគីឥណ្ឌា និងប៉ាគីស្ថាន កាលពីចុងសប្តាហ៍មុន កំពុងបន្តនៅឡើយ ប៉ុន្តែនៅតែមានរបាយការណ៍ពីការវាយប្រហារគ្នាទៅវិញទៅមកដដែល។
គួរបញ្ជាក់ថា នៅក្នុងសុន្ទរកថារបស់លោក Modi បានបន្ថែមថា ប្រសិនបើការវាយប្រហារភេរវកម្មណាមួយផ្សេងទៀតបន្តប្រឆាំងនឹងឥណ្ឌា នោះការឆ្លើយតបដែលមិននឹកស្មានដល់នឹងត្រូវកើតឡើង៕
ដោយ៖ ពេជ្រ
