ប្រទេសសេណេហ្គាល់ និងបារាំងបានព្រមព្រៀងគ្នាបង្កើតគណៈកម្មការមួយដើម្បីរៀបចំការដកកងទ័ពបារាំងចេញពីប្រទេសអាហ្វ្រិកខាងលិចមួយនេះ និងការផ្ទេរមូលដ្ឋានទ័ពនៅចុងឆ្នាំ ២០២៥ ។
រដ្ឋមន្ត្រីការបរទេសបារាំងលោក Jean-Noel Barrot និងសមភាគីសេណេហ្គាល់គឺលោក Yassine Fall បានប្រកាសការសម្រេចចិត្តនៅក្នុងសេចក្តីថ្លែងការណ៍រួមមួយកាលពីថ្ងៃពុធ។ ភាគីទាំងពីរបានឲ្យដឹងថា ប្រទេសទាំងពីរមានបំណងធ្វើការឆ្ពោះទៅរកភាពជាដៃគូការពារជាតិ និងសន្តិសុខថ្មីមួយ ដែលគិតគូរពីអាទិភាពជាយុទ្ធសាស្រ្តរបស់ភាគីទាំងអស់។
ការចាកចេញដែលបានគ្រោងទុករបស់ទាហានបារាំងប្រហែល ៣៥០នាក់ដែលឈរជើងនៅក្នុងប្រទេសអាហ្រ្វិកធ្វើឡើងបន្ទាប់ពីការសម្រេចចិត្តរបស់ប្រធានាធិបតីសេណេហ្គាល់ Bassirou Diomaye Faye ក្នុងការដកវត្តមានយោធារបស់អតីតអំណាចអាណានិគមទាំងស្រុង។
នៅក្នុងខែវិច្ឆិកា លោក Faye ដែលកាន់តំណែងតិចជាងមួយឆ្នាំបានប្រកាសមូលដ្ឋានទ័ពបារាំងនៅទីនោះ វាមិនស៊ីគ្នា ជាមួយអធិបតេយ្យភាពរបស់សេណេហ្គាល់នោះទ្បើយ។
កាលពីសប្តាហ៍មុន ប្រព័ន្ធផ្សព្វផ្សាយក្នុងស្រុកបានរាយការណ៍ថាទីក្រុងប៉ារីសបានចាប់ផ្តើមដកកងកម្លាំងរបស់ខ្លួនចេញពីអតីតអាណានិគម ហើយបានប្រគល់មូលដ្ឋានយោធាចំនួនបីទៅឱ្យរដ្ឋាភិបាលសេណេហ្កាល់។ យោងតាមសារព័ត៌មានបារាំងជាច្រើនបានឲ្យដឹងថា ទីក្រុងប៉ារីសគ្រោងនឹងដកកងទ័ពចេញពីជំរុំកងទ័ពទាំងប្រាំក្នុងប្រទេសសេណេហ្គាល់នៅចុងខែកញ្ញាខាងមុខនេះ។
ប្រសិនបើបានបញ្ចប់ ការផ្លាស់ប្តូរនេះនឹងបន្ថែមទីក្រុងដាកាទៅក្នុងបញ្ជីរដ្ឋាភិបាលអាហ្រ្វិក ដែលបានផ្តាច់ទំនាក់ទំនងការពារជាតិជាមួយប្រទេសបារាំងក្នុងប៉ុន្មានឆ្នាំថ្មីៗនេះ។ ទីក្រុងប៉ារីសបានដកទាហាន និងអាកាសយានិកប្រមាណ ១.៥០០នាក់ចុងក្រោយរបស់ខ្លួនចេញពីប្រទេសនីហ្សេក្នុងខែធ្នូ ឆ្នាំ២០២៣ បន្ទាប់ពី Niamey បានទាមទារឱ្យពួកគេចាកចេញបន្ទាប់ពីរដ្ឋប្រហារនៅថ្ងៃទី ២៦ ខែកក្កដា ឆ្នាំដដែល។ ប្រទេសម៉ាលី និងបួគីណាហ្វាសូ ដែលស្ថិតក្រោមការគ្រប់គ្រងរបស់យោធា បានបណ្តេញកងទ័ពបារាំង ក្រោមការចោទប្រកាន់ថា បរាជ័យក្នុងការប្រយុទ្ធប្រឆាំងនឹងក្រុមបះបោរជីហាដនៅក្នុងតំបន់ Sahel។
កាលពីចុងខែមករា កងទ័ពបារាំងបានប្រគល់មូលដ្ឋាននៅសេសសល់របស់ខ្លួននៅប្រទេសឆាដ ដែលជាទីតាំងឈរជើងចុងក្រោយរបស់បារាំងក្នុងតំបន់ Sahel ដែលមានបញ្ហា។ ប្រទេសអាហ្វ្រិកកណ្តាលបានបញ្ឈប់កិច្ចសហប្រតិបត្តិការយោធាភ្លាមៗជាមួយអតីតមេដឹកនាំអាណានិគមរបស់ខ្លួននៅក្នុងខែវិច្ឆិកា ដោយប្រកាសថាកិច្ចព្រមព្រៀងនេះលែងប្រើហើយ។
កាលពីខែធ្នូ ប្រធានាធិបតីនៃប្រទេសកូតឌីវ័រ (Cote d’Ivoire) លោក Alassane Ouattara ក៏បានប្រកាសអំពី ការដកទ័ព នៃកងកម្លាំងបារាំងប្រមាណ ៦០០ នាក់ ពីប្រទេសដែលជិតមកដល់នាពេលឆាប់ៗដែលជាសកម្មភាពដែលគាត់អះអាងថាមានគោលបំណងធ្វើទំនើបកម្មកងកម្លាំងប្រដាប់អាវុធជាតិ។
ខណៈពេលដែលទីក្រុងប៉ារីសបានចោទប្រកាន់រុស្ស៊ីថាបានរួមចំណែកដល់ការបរាជ័យផ្នែកយោធារបស់ខ្លួននៅក្នុងទ្វីបអាហ្រ្វិក អ្នកនយោបាយបារាំង និងសមាជិកសភាអឺរ៉ុបលោក Thierry Mariani បានស្តីបន្ទោសប្រធានាធិបតី Emmanuel Macron ចំពោះគោលនយោបាយការបរទេសរបស់ប្រទេសបារាំងដែលជាមហន្តរាយនៅក្នុងទ្វីបទាំងមូល។ នេះបើយោងតាមការផ្តល់បទសម្ភាសន៍ជាមួយសារព័ត៌មាន RIA Novosti កាលពីចុងឆ្នាំមុន៕
ដោយ៖ ពេជ្រ
