កីឡាករបាល់ទាត់របស់ក្លឹបបារាំង Paris Saint-Germain កីឡាករ Achraf Hakimi បានជាប់ជាកីឡាករបាល់ទាត់ឆ្នើមប្រចាំឆ្នាំរបស់ទ្វីបអាហ្រ្វិក ដោយក្លាយជាខ្សែការពារដំបូងគេដែលបានឈ្នះរង្វាន់នេះក្នុងរយៈពេល ៥២ ឆ្នាំ។
ខ្សែការពារស្តាំរបស់ក្រុមជម្រើសជាតិម៉ារ៉ុក Hakimi បានផ្ដួលខ្សែប្រយុទ្ធអេហ្ស៊ីប Mohamed Salah របស់ Liverpool និងខ្សែប្រយុទ្ធនីហ្សេរីយ៉ា Victor Osimhen ក្នុងការបោះឆ្នោតកាលពីថ្ងៃពុធនៅឯពានរង្វាន់ CAF ឆ្នាំ 2025 នៅទីក្រុង Rabat ប្រទេសម៉ារ៉ុក។
Hakimi បានទទួលពានរង្វាន់នេះបន្ទាប់ពីបានជួយ PSG ឱ្យឈ្នះជើងឯក Champions League លើកដំបូងរបស់ពួកគេក្នុងខែឧសភា នៅពេលដែលពួកគេបានលុតក្រុម Inter Milan របស់អ៊ីតាលី 5-0 នៅវគ្គផ្តាច់ព្រ័ត្រ ដែលជាផ្នែកមួយនៃរដូវកាលឈ្នះបីជាប្រវត្តិសាស្ត្រ ដែលពួកគេក៏បានឈ្នះពានរង្វាន់ Ligue 1 និង Coupe de France ផងដែរ៕
