ដោយមានការសហការពីកញ្ញា អន ស្រីនូ, លោក ជិន ចិន្តា និងចែ អ៊ីស៊ូយ៉ឹន រួមទាំងសប្បុរសជនមួយចំនួនទៀត ម្ចាស់ប្រេនស្ក្រាប់អ្នកមីងទី២(គង្គា ជីវ៉ា) បានឧបត្ថម្ភកម្មវិធីសប្បុរសធម៌ ដែលបានរៀបចំទ្បើង នៅថ្ងៃទី១ ខែមករា ឆ្នាំ២០២៥ នៅក្នុងភូមិសង្កែ ឃុំឈើទាល ស្រុកស្វាយជ្រំ ខេត្តស្វាយរៀង។ ប្រជាពលរដ្ឋដែលមានជីវភាពក្រីក្រ និងចាស់ជរាចំនួន ៥២ គ្រួសារ ទទួលបានសម្ភារៈ និងថវិកាមួយចំនួនពីកម្មវិធីនេះ។
កម្មវិធីខាងលើនេះក៏មានការចូលរួមពីលោក ចាន់ សារឿន មេឃុំឈើទាល,លោក ជាម ជុង មេភូមិសង្កែ និងលោក អន សាខន មេភូមិចេក រួមទាំងព្រះសង្ឃ លោកអាចារ្យផងដែរ។
កញ្ញា អន ស្រីនូ បានឲ្យដឹងថា កម្មវិធីសប្បុរសធម៌នេះ ទទួលបានការឧបត្ថម្ភធំដោយ ម្ចាស់ប្រេនស្ក្រាប់អ្នកមីងទី២(គង្គ ជីវ៉ា) រួមសហការឧបត្ថម្ភដោយរូបកញ្ញា លោក ជិន ចិន្តា និងចែ អ៊ីស៊ូយ៉ន។ កញ្ញាបានបញ្ជាក់ដែរថា កម្មវិធីនេះគឺជាកម្មវិធីសប្បុរសជនសុទ្ធសាធដើម្បីជួយសម្រួលដល់ការលំបាករបស់ប្រជាពលរដ្ឋដែលមានជីវភាពក្រលំបាក និងចាស់ជរាគ្មានទីពឹងជាដើម។
ចំណែកអំណោយដែលទទួលបានពីកម្មវិធីសប្បុរសធម៌នេះគឺរួមមាន ម្នាក់ៗទទួលបាន៖ អង្ករ ៥ គីទ្បូក្រាម, មី ១ កេស, សារុង ១, ត្រីខកំប៉ុង ១ យួរ និងថវិកាចំនួន៥០០០០រៀល។
ប្រជាពលរដ្ឋក្រីក្រ ចាស់ជរា ដែលទទួលបាននូវអំណោយសប្បុរសធម៌នាពេលនេះបានសម្តែងនូវការត្រេកអរ និងអរគុណចំពោះសប្បុរសជនទាំងអស់ដែលបាននាំយកអំណោយជាថវិកាសម្ភារៈមកជូនពួកគាត់ដែលកំពុងជួបការខ្វះខាត ហើយទោះបីជាអំណោយតិចតួចក៏ពិតមែន តែនោះជាទឹកចិត្តប្រកបដោយសប្បុរសធម៌ និងមានសារសំខាន់ណាស់សម្រាប់ប្រជាពលរដ្ឋដែលមានជីវភាពក្រីក្រ ចាស់ជរាដែលកំពុងប្រឈមការខ្វះខាត។ ប្រជាពលរដ្ឋទាំងអស់ក៏សូមជូនពរដល់សប្បុរសជន សូមជួបប្រទះនូវពុទ្ធពរទាំង៥ ប្រការ គឺ អាយុ វណ្ណៈ សុខៈ ពលៈ និងបដិភាណៈកុំបីឃ្លៀងឃ្លាតទ្បើយ៕
