ប្រធានាធិបតីអាមេរិក លោក ដូណាល់ ត្រាំ បានប្រាប់អ្នកយកព័ត៌មាននៅសេតវិមាន នៅទីក្រុង Bedminster រដ្ឋ New Jersey ថា ទណ្ឌកម្មរបស់អឺរ៉ុប ប្រឆាំងនឹងរុស្ស៊ី គឺខ្សោយពេក។
មេដឹកនាំអាមេរិករូបនេះ បាននិយាយថា ទណ្ឌកម្មដែលអឺរ៉ុប កំពុងដាក់លើប្រទេសរុស្ស៊ី គឺមិនទាន់គ្រប់គ្រាន់ទេ ប៉ុន្តែខ្ញុំ ក៏នឹងរៀបចំដើម្បីដាក់សម្ពាធលើលោក ពូទីន ដូចគ្នា។ ដូច្នេះហើយអឺរ៉ុប គួរតែពង្រឹង និងបន្ថែមទម្ងន់ទណ្ឌកម្ម។
ទោះជាយ៉ាងណា លោក បានបន្ថែមថា ដរាបណាអឺរ៉ុប បន្តទិញប្រេងរុស្ស៊ី ទណ្ឌកម្មណាមួយ រួមទាំងសម្ពាធរបស់អាមេរិក ក៏គ្មានបានប្រយោជន៍នោះដែរ។
លោក បានបញ្ជាក់ថា លោក ត្រៀមដាក់ទណ្ឌកម្មយ៉ាងតឹងរ៉ឹងលើទីក្រុងមូស្គូ ប្រសិនបើសមាជិកណាតូទាំងអស់ធ្វើសកម្មភាពរួមគ្នា និងបញ្ឈប់ការទិញប្រេងពីរុស្ស៊ី។ លោក ក៏បានអំពាវនាវឱ្យប្រទេសណាតូដាក់ពន្ធនាំចូលពី ៥០-១០០ ភាគរយ លើប្រទេសចិនដោយលើកហេតុផលថានេះនឹងជួយដោះស្រាយវិបត្តិអ៊ុយក្រែន៕
ដោយ៖ ពេជ្រ
