រុស្ស៊ី ថាគ្មានសន្តិភាពអ៊ុយក្រែនណាដែលសម្រេច ដោយមិនឆ្លងកាត់ខ្លួនទេ

មន្ត្រីការទូតរុស្ស៊ី បាននិយាយ កាលពីថ្ងៃពុធ ដោយព្រមានលោកខាងលិចថា ការប៉ុនប៉ងដោះស្រាយបញ្ហាសន្តិសុខទាក់ទងនឹងអ៊ុយក្រែន ដោយគ្មានការចូលរួមពីទីក្រុងមូស្គូ គឺប្រៀបដូចជាវង្វេងផ្លូវដែលមិនដឹងទិសដៅ។

ការលើកឡើងរបស់រដ្ឋមន្ត្រីការបរទេស លោក Sergei Lavrov ស្របពេលដែលលោកខាងលិច កំពុងព្យាយាមធានាការការពារនាពេលអនាគត សម្រាប់អ៊ុយក្រែន ។

លោក ក៏បានរិះគន់ការធានារបស់មេដឹកនាំអឺរ៉ុប ពេលជួបជាមួយប្រធានាធិបតីសហរដ្ឋអាមេរិកលោក Donald Trump និងប្រធានាធិបតីអ៊ុយក្រែនលោក Volodymyr Zelenskyy នៅសេតវិមាន កាលពីថ្ងៃចន្ទ ដើម្បីពិភាក្សាអំពីការធានាសន្តិសុខសម្រាប់អ៊ុយក្រែនដែលអាចជួយបញ្ចប់សង្រ្គាមដែលមានរយៈពេល ៣ ឆ្នាំកន្លះ ផងដែរ។