មេដឹកនាំរបបយោធាដែលកំពុងកាន់អំណាចរបស់ប្រទេសមីយ៉ាន់ម៉ា បានធ្វើការអំពាវនាវដ៏កម្រមួយ សម្រាប់ជំនួយពីសហគមន៍អន្តរជាតិ បន្ទាប់ពីការរញ្ជួយដីដ៏សាហាវ វាយប្រហារប្រទេសនេះ។
លោក Min Aung Hlaing បាននិយាយ នៅក្នុងសន្ទរកថាតាមទូរទស្សន៍ កាលពីថ្ងៃសុក្រថា ខ្ញុំបានទៅមើលទីតាំងដែលរងផលប៉ះពាល់ដោយផ្ទាល់មួយចំនួន ដើម្បីវាយតម្លៃស្ថានភាព។ ខ្ញុំចង់អំពាវនាវឱ្យសហគមន៍អន្តរជាតិ គាំទ្របេសកកម្មជួយសង្គ្រោះដែលកំពុងបន្ត ។
លោក បន្តថា ខ្ញុំបានប្រកាសស្ថានភាពក្នុងភាពអាសន្ន ហើយស្នើសុំជំនួយពីអន្តរជាតិ ដោយបន្ថែមថា ឥណ្ឌា ជាប្រទេសដំបូងដែលនឹងបញ្ជូនជំនួយមក។ ខ្ញុំសូមលើកឡើងនូវការអំពាវនាវជាចំហដល់អង្គការ និងប្រទេសណាដែលមានឆន្ទៈមកជួយប្រជាជនដែលខ្វះខាតក្នុងប្រទេសរបស់យើង ។
លោក បានបញ្ជាក់ថា យ៉ាងហោចណាស់មនុស្ស ៩៦ នាក់ ស្លាប់នៅក្នុងរដ្ឋធានី Naypyidaw ភាគកណ្តាលនៃប្រទេសមីយ៉ាន់ម៉ា និងរាប់សិបនាក់ទៀតស្លាប់នៅក្នុងទីក្រុងផ្សេងៗទៀត ក្នុងចំនួនច្រើន ហើយយ៉ាងហោចណាស់មនុស្សចំនួន ៧៣២ នាក់ រងរបួស។ លោក បន្ថែមថា ចំនួនអ្នកស្លាប់ត្រូវបានគេរំពឹងថានឹងកើនឡើងលើនេះ បន្តទៀត៕
ដោយ៖ ពេជ្រ
