ប្រធានាធិបតីសហរដ្ឋអាមេរិក Donald Trump បានបញ្ចប់កិច្ចប្រជុំនៅទីក្រុង Washington ជាមួយប្រធានាធិបតីអ៊ុយក្រែន Volodymyr Zelenskyy និងសមភាគីអឺរ៉ុបរបស់លោក។ លោកបាននិយាយថា លោកនឹងរៀបចំជំនួបរវាងមេដឹកនាំអ៊ុយក្រែន និងរុស្ស៊ីនាពេលឆាប់ៗនេះ។
លោក Trump បានបង្ហោះនៅលើប្រព័ន្ធផ្សព្វផ្សាយសង្គមនៅចុងបញ្ចប់នៃកិច្ចប្រជុំនៅឯសេតវិមានដោយនិយាយថា “ ខ្ញុំបានទូរស័ព្ទទៅប្រធានាធិបតីពូទីន ហើយបានចាប់ផ្តើមការរៀបចំសម្រាប់កិច្ចប្រជុំនៅទីតាំងដែលត្រូវកំណត់រវាងប្រធានាធិបតីពូទីន និងប្រធានាធិបតី Zelenskyy”។ លោក Trump ក៏បាននិយាយផងដែរថា បន្ទាប់មកពួកគេនឹងធ្វើកិច្ចប្រជុំត្រីភាគី។
Trump ក៏បានធ្វើអត្ថាធិប្បាយលើកិច្ចពិភាក្សាជាមួយមេដឹកនាំអឺរ៉ុប និងលោក Zelenskyy ផងដែរ។ គាត់បាននិយាយថា “ យើងបានពិភាក្សាអំពីការធានាសន្តិសុខសម្រាប់អ៊ុយក្រែន ដែលការធានានឹងត្រូវបានផ្តល់ដោយបណ្តាប្រទេសអឺរ៉ុបផ្សេងៗ ដោយមានការសម្របសម្រួលជាមួយសហរដ្ឋអាមេរិក”។ លោកថា វាជាដំណើរទស្សនកិច្ចលើកដំបូងរបស់ Zelenskyy ទៅកាន់ការិយាល័យ Oval ចាប់តាំងពីការប្រជុំនៅខែកុម្ភៈរបស់ពួកគេ ដែលបានឈានដល់ការឈ្លោះប្រកែកគ្នាយ៉ាងក្តៅគគុករវាង ត្រាំ និង ហ្សេ ទ្បេនស្គី។
កិច្ចប្រជុំកាលពីថ្ងៃចន្ទរវាងលោក ត្រាំ និងលោក ហ្សេ ទ្បេនស្គី រួមទាំងសហភាពអ៊ឺរ៉ុប បានធ្វើឡើងបន្ទាប់ពីកិច្ចប្រជុំកំពូលនៅអាឡាស្ការបស់លោក Trump ជាមួយប្រធានាធិបតីរុស្ស៊ីលោក Vladimir Putin កាលពីថ្ងៃសុក្រ។ ភ្លាមៗបន្ទាប់ពីកិច្ចប្រជុំនោះលោកត្រាំក៏បានជួបជាមួយ Zelenskyy ពួកគេទាំងពីរត្រូវបានចូលរួមដោយមេដឹកនាំអឺរ៉ុប។
Trump បានអត្ថាធិប្បាយលើការធានាសន្តិសុខនៅដើមដំបូងនៃកិច្ចប្រជុំទូលំទូលាយ។ លោកបាននិយាយថា ប្រជាជាតិអឺរ៉ុបនឹងទទួលបន្ទុកច្រើន ហើយអាមេរិកនឹងជួយធ្វើឲ្យអ៊ុយក្រែនមានសុវត្ថិភាពខ្លាំង។ លោកប្រធានាធិបតីក៏បាននិយាយថា លោកពូទីនបានយល់ព្រមថារុស្ស៊ីនឹងទទួលយកការធានាសន្តិសុខនោះ។
លោក Zelenskyy បានសង្កត់ធ្ងន់ថា លោកបានត្រៀមខ្លួនរួចជាស្រេចដើម្បីពិភាក្សាអំពីបញ្ហារសើបទាំងអស់ រួមទាំងទឹកដីផងដែរ៕
ដោយ៖ ពេជ្រ
