ខេត្តរតនគិរី÷ គណៈបញ្ជាការឯកភាពរដ្ឋបាលខេត្តរតនគិរី បានចុះរឹតបន្តឹងការអនុវត្តច្បាប់ចរាចរណ៍ផ្លូវគោកដឹកនាំដោយលោកវរសេនីយ៍ឯក ម៉ា សំអាត នាយការិយាល័យនគរបាលចរាចរណ៍ផ្លូវគោក បានដឹកនាំកម្លាំងចំនួន២៥នាក់ ចុះធ្វើការរឹតបន្តឹងការអនុវត្តច្បាប់ចរាចរណ៍ផ្លូវគោក។
ការចុះអនុវត្តច្បាប់ចរាចរណ៍នេះធ្វើឡើងនៅយប់ថ្ងៃទី១៣ ខែមីនា ឆ្នាំ២០២៥(ចាប់ពីម៉ោង ២០:០០នាទីដល់ម៉ោង២៣:០០នាទី
ក្នុងភូមិសាស្ត្រខេត្តរតនគិរី ស្ថិតនៅចំណុចគោលដៅ
មុខវិទ្យាល័យសម្ដេចឪ សម្ដេចម៉ែ នៅតាមបណ្តោយផ្លូវជាតិលេខ៧៨ ស្ថិតក្នុងភូមិអភិវឌ្ឍន៍ សង្កាត់ឡាបានសៀក ក្រុងបានលុង ខេត្តរតនគិរី។
យោងតាមរបាយការណ៍ បានបង្ហាញថា ជាលទ្ធផលក្រុមការងារ បានត្រួតពិនិត្យយានយន្តឆ្លងកាត់ សរុបចំនួន ១១២គ្រឿង ក្នុងនោះ ឃាត់យានយន្ដតុបតែងភ្លើងខុសលក្ខណៈបច្ចេកទេស និងអ្នកបើកបរម៉ូតូមិនពាក់មួកសុវត្ថិភាព បានចំនួន ៥១គ្រឿងមានដូចជា៖
១-រថយន្ដធុនស្រាលចំនួន ១១ គ្រឿង
២-រថយន្ដធុនធ្ងន់ចំនួន ០៦ គ្រឿង
៣-ម៉ូតូសណ្ដោងរ៉ុម៉កចំនួន ០៣ គ្រឿង
៤-ម៉ូតូកង់បីចំនួន ០៦គ្រឿង
៥-អ្នកបើកបរម៉ូតូមិនពាក់មួកសុវត្ថិភាពមានចំនួន ២៥គ្រឿង។
សូមបញ្ជាក់ថា ករណីល្មើសខាងលើនេះ កម្លាំងនគរបាលចរាចរណ៍បានធ្វើការអប់រំ ណែនាំនៅគោលដៅ ដើម្បីឲ្យចូលរួមគោរពច្បាប់ចរាចរណ៍ផ្លូវគោកទាំងអស់គ្នា ប៉ុន្តែពុំបានធ្វើការផាកពិន័យនោះទេ៕
